Ավստրիան պատրաստ է պաշտպանել իր շահերը, եթե ԱՄՆ-ի հակառուսական պատժամիջոցներն ազդեն Եվրոպայի վրա
Ավստրիան պատրաստ է պաշտպանել իր ազգային շահերը՝ ԱՄՆ-ի կողմից հակառուսական պատժամիջոցները եվրոպական ընկերությունների նկատմամբ կիրառելու դեպքում և մտադիր է համաձայնեցնել իր գործողությունները Եվրահանձնաժողովի հետ. այս մասին ՏԱՍՍ-ին հայտնել են Ավստրիայի՝ Եվրոպայի, ինտեգրացիայի և արտաքին հարցերով նախարարությունում:
Ավստրիայի կանցլեր Քրիստիան Քերնի պաշտոնական ներկայացուցիչ Յուրգեն Շվարցը տեղեկացրել է, որ ԱՄՆ-ի պատժամիջոցները կարող են բացասաբար ազդել էներգետիկ ենթակառուցվածքների ոլորտում եվրոպական ընկերությունների աշխատանքի վրա: Այս առիթով ավստրիական կառավարությունը հայտնել է, որ անհանգստությամբ է հետևում միակողմանի հակառուսական պատժամիջոցների օգնությամբ սեփական տնտեսական շահերը Եվրոպայում իրականացնելու ԱՄՆ-ի փորձերին՝ միևնույն ժամանակ անընդունելի համարելով ամերիկյան օրենքներն ամբողջ աշխարհում կիրառելու փորձերը։
ՏԱՍՍ-ի փոխանցմամբ՝ «Հյուսիսային հոսք-2» գազատարի կառուցման մեջ ներգրավված խոշորագույն ավստրիական ընկերությունները՝ նավթագազային OMV-ն և պողպատային Voestalpine-ն, հայտնել են, որ ուշադրությամբ հետևում են ԱՄՆ-ի կողմից հակառուսական պատժամիջոցների հետ կապված իրավիճակին և հավատարիմ են մնում Մոսկվայի հետ պայմանավորվածություններին:
Ավստրիայի Էկոնոմիկայի պալատի ղեկավար Քրիստոֆ Լյայթլը նույնպես հանդես է եկել ԱՄՆ-ի հակառուսական պատժամիջոցների դեմ հայտարարությամբ՝ Եվրամիությանը կոչ անելով չհամակերպվել պատժամիջոցների հետ, քանի որ դրանք բացասաբար կանդրադառնան բոլոր կողմերի վրա: Նա ընդգծել է, որ ամերիկացիները վաղուց են ցանկանում խարխլել Եվրոպայի և Ռուսաստանի հարաբերությունները՝ հետապնդելով սեփական առևտրային, տնտեսական և էներգետիկ շահերը:
Հիշեցնենք, որ անցյալ շաբաթ ԱՄՆ-ի Կոնգերսի երկու պալատներն ընդունել են Ռուսաստանի, Իրանի և Հյուսիսային Կորեայի դեմ պատժամիջոցների խստացման մասին օրինագիծը: Դրա հաստատման համար պակասում է միայն նախագահ Թրամփի ստորագրությունը: Եվրոպացիներին մտահոգում է, որ դրանց միջոցով ԱՄՆ-ն փորձում է սահմանափակել Ռուսաստանի հետ համագործակցության ուղիները և առաջնային դարձնել ամերիկյան էներգետիկ պաշարների արտահանումը Եվրոպա: