«Ինտերֆաքս»-ը տեղեկացրել է Թրամփի կողմից նոր հակառուսական օրինագծի ստորագրման մասին
ԱՄՆ նախագահ Դոնալդ Թրամփն ստորագրել է Ռուսաստանի դեմ պատժամիջոցների ընդլայնման օրինագիծը: Դրանց չեղարկման համար անհրաժեշտ է Մոսկվայի կողմից Վաշինգտոնի պայմանների կատարում. այս մասին տեղեկացնում է «Ինտերֆաքս»-ը՝ հղում կատարելով պաշտոնական այցով Վրաստանում գտնվող ԱՄՆ-ի փոխնախագահ Մայք Փենսի հայտարարությանը:
Քաղաքական գործչի խոսքով՝ Մոսկվայի վերջին քայլերն ապացուցում են, որ նա պատրաստ չէ ընդունել Վաշինգտոնի պահանջները:
Ռիա Նովոստի-ն տեղեկացնում է, որ ԱՄՆ-ի փոխնախագահը պարզապես իր համոզմունքն է հայտնել՝ ասելով, որ Թրամփը կստորագրի հակառուսական պատժամիջոցների օրինագիծը:
«Մոսկվայի հանդեպ սահմանափակող միջոցառումների մասին օրինագիծը, որը վերջնականապես կստորագրվի Դոնալդ Թրամփի կողմից, կապացուցի, որ մենք անում ենք այն, ինչ ասում ենք»,- մամլո ասուլիսի ընթացքում հայտարարել է Փենսը:
Ավելի ուշ «Ինտերֆաքս»-ը չեղյալ է հայտարարել ամերիկյան առաջնորդի կողմից օրինագծի ստորագրման մասին հրապարակումը՝ ընդգծելով, որ փոխնախագահը պարզապես հայտարարել է այդ իրադարձության մասին: «Նախագահ Թրամփը շատ շուտով կստորագրի հակառուսական պատժամիջոցների խստացման օրինագիծը»,- պաշտոնյայի խոսքերը փոխանցել է գործակալությունը:
Հիշեցնենք, որ հուլիսի 27-ին ԱՄՆ-ի Սենատն ընդունել է Ռուսաստանի, Իրանի և Հյուսիսային Կորեայի նկատմամբ պատժամիջոցների խստացման օրինագիծը: Ռուսաստանը, չսպասելով ԱՄՆ-ի առաջնորդի կողմից փաստաթղթի ստորագրմանը, պատասխան քայլեր ձեռնարկեց` կրճատելով Ռուսաստանում ամերիկյան դիվանագիտական առաքելության անդամների թիվը 755-ով և փակելով ԱՄՆ-ի դեսպանատան ամառանոցների հասանելիությունը:
Ինչպես նշում է Լենտա-ն, ամերիկյան նոր օրինագիծը նախատեսում է մի քանի սահմանափակումներ. առաջարկվում է կրճատել պատժամիջոցների տակ գտնվող բանկերի ֆինանսավորման ժամկետը՝ դարձնելով 14 օր, իսկ նավթագազային ընկերություններինը՝ 30 օր: Նաև ենթադրվում է, որ ԱՄՆ-ի նախագահը կարող է միջոցներ ձեռնարկել այն ընկերությունների դեմ, որոնք մեկ տարվա ընթացքում հինգ միլիոն դոլարից ավել ներդրումներ կանեն ռուսական արտահանման խողովակաշարերի կառուցման գործում: Բացի այդ, փաստաթղթում առանձին կետով նշվում է «Հյուսիսային հոսք-2» գազատարի կառուցմանը խանգարելու ԱՄՆ-ի ձգտման մասին: