Քրիստոֆեր Ռեյը՝ ԱՄՆ Հետաքննությունների դաշնային բյուրոյի նոր ղեկավար
ԱՄՆ Կոնգրեսի Սենատը ձայների մեծամասնությամբ հաստատել է Քրիստոֆեր Ռեյի թեկնածությունը Հետաքննությունների դաշնային բյուրոյի (ՀԴԲ) ղեկավարի պաշտոնում. տեղեկացնում է CNN-ը:
Ռեյի նշանակման օգտին է քվեարկել 92, դեմ՝ երեք սենատոր: Մոտ ժամանակներս կհայտարարվի, թե երբ է տեղի ունենալու վարչության նոր պետի երդմնակալության արարողությունը:
Նշենք, որ Ռեյի թեկնածությունը պաշտոնապես առաջարկվել է նախագահ Դոնալդ Թրամփի կողմից հունիսի 7-ին: Ընդ որում, նախագահը նրան անվանել է «կատարելապես որակավորված» մասնագետ և ուշադրություն հրավիրել այն փաստի վրա, որ նախկինում Ռեյը համակարգել է «ահաբեկչության դեմ պայքարում ԱՄՆ-ի արդարադատության նախարարության գործունեությունը՝ 2001 թ. սեպտեմբերի 11-ի դեպքերից հետո»: Սպիտակ տան ղեկավարը համոզմունք էր հայտնել, որ Սենատի կողմից նրա թեկնածության հաստատման դեպքում Ռեյը կդառնա «օրենքի անկոտրում պաշտպան»:
Հիշեցնենք, որ Թրամփը ՀԴԲ-ի նախկին պետ Ջեյմս Քոմիին ազատել է աշխատանիքից մայիսի 9-ին՝ ընդգծելով, որ գոհ չի եղել վերջինիս աշխատանքից: Քոմին այդ պաշտոնին էր նշանակվել 2013 թ. ամռանը՝ Բարաք Օբամայի վարչակազմի օրոք:
Քրիստոֆեր Ռեյն իրավաբանական կրթություն է ստացել Ելի համալսարանում, 2003-2005 թ․թ., զբաղեցրել է արդարադատության նախարարի օգնականի պաշտոնը: Ներկա պահին համագործակցում է King&Spalding իրավաբանական ընկերության հետ: Որպես փաստաբան պաշտպանում է Նյու Ջերսիի նահանգապետ Քրիսա Քրիստիի շահերը: