ՌԴ պաշտպանության նախարարությունը և սիրիական ընդդիմությունը համաձայնության են եկել ևս մեկ անվտանգության գոտի ստեղծելու վերաբերյալ

Հուլիսի 31-ին Կահիրեում անցկացված բանակցությունների արդյունքում Ռուսաստանի զինված ուժերի և սիրիական չափավոր ընդդիմության ներկայացուցիչները համաձայնության են եկել Հոմս քաղաքի հյուսիսում անվտանգության երրորդ գոտի ստեղծելու վերաբերյալ. ՌԴ ՊՆ ներկայացուցիչ Իգոր Կոնաշենկովի հայտարարությունը փոխանցում է «Ինտերֆաքս»-ը:

«Օգտոստոսի 3-ին՝ տեղի ժամանակով 12.00-ին, չափավոր ընդդիմության ջոկատները և կառավարական զորամիավորումները դադարեցնում են բոլոր զինատեսակներից արձակվող կրակը»,- ասել է Կոնաշենկովը:

Գեներալն ընդգծել է, որ ինչպես արդեն գործող երկու անվտանգության գոտիներում, «Հոմս» շրջանում նույնպես հրադադարի ռեժիմը չի կիրառվում «Իսլամական պետություն» և «Ջեբհաթ ալ Նուսրա» խմբավորումների նկատմամբ:

Կանաշենկովը հավելել է, որ ընդդիմությունն ստանձնել է Հոմս նահանգում իր վերահսկողության տակ գտնվող տարածքներից ահաբեկիչներին միացած ջոկատների դուրսբերման պարտավորությունը: «Հոմս» գոտու մեջ են ներառվել 84 բնակավայրեր՝ 147 հազար բնակչությամբ:

Ինչպես նշում է Լենտա-ն, մայիսի 4-ին Սիրիայում հրադարադի հաստատման երաշխավոր երկրները՝ Ռուսաստանը, Թուրքիան և Իրանը ստորագրեցին երկրում չորս անվտանգության գոտի ստեղծելու հուշագիր: Համբուրգի գագաթնաժողովում Պուտին-Թրամփ հանդիպման արդյունքում հայտարարվեց Սիրիայի հարավում ևս անվտանգության գոտի ստեղծելու որոշման մասին: