Սիրիայում ԱՄՆ-ի գլխավորած միջազգային կոալիցիայի ավիահարվածների արդյունքում խաղաղ բնակիչներ են զոհվել

ԱՄՆ-ի գլխավորած միջազգային կոալիցիան հերթական ավիահարվածն է հասցրել Իսլամական պետության՝ սիրիական Ռաքքայում գտնվող հենակետերին։ Ինչպես հայտնում է «ՍԱՆԱ» լրատվական գործակալությունը, ավիահարվածի արդյունքում զոհվել է ութ խաղաղ բնակիչ՝ որոնցից յոթը երեխաներ են եղել։ Նշվում է, որ զոհվածներն ընտանիքի անդամներ են եղել։

Աղբյուրի համաձայն՝ ավիահարվածը տեղի է ունեցել վաղ առավոտյան՝ քաղաքի Իմամ ալ Նուրի մզկիթի թաղամասում, ինչպես նաև քաղաքի հյուսիսում գտնվող զորանոցի մոտակայքում։

Նախորդ անգամ միջազգային կոալիցիան Ռաքքայում ավիահարված էր իրականացրել հուլիսի 28-ին։ Ավիահարվածի արդյունքում զոհվել էր 50 խաղաղ բնակիչ, ևս 90-ը մարմնական վնասվածքներ էր ստացել։

ԱՄՆ-ի գլխավորած միջազգային կոալիցիան աջակցություն է ցույց տալիս քրդական «Սիրիայի դեմոկրատական ուժերի» ջոկատներին։