ԱՄՆ-ը ցանկանում է ստեղծել տեղային կիրառության փոքրածավալ միջուկային ռումբեր
Միացյալ Նահանգների զինվորական շրջանակները մեծ հույսեր են կապում փոքր ծավալի միջուկային ռումբեր ստեղծելու ծրագրի հետ, որը հնարավորություն կտա ըստ անհրաժեշտության կարգավորել ռումբի հզորությունը: Ամերիկյան International Business Times պարբերականի փոխանցմամբ՝ ԱՄՆ-ի ռազմաօդային ուժերի հրամանատարությունը լրջորեն դիտարկում է նման ռումբերի կիրառության հնարավորությունը՝ հաշվի առնելով, որ դրանք կարող են օգտագործվել ինչպես փոքր թաղամասների, այնպես էլ ամբողջական քաղաքների ոչնչացման համար:
Թեև ամերիկյան օդուժը փոքր տեղայնության գրոհների ժամանակ արդեն հիմա կիրառում է գրավիտացիոն ռումբեր, նույնը, սակայն, չի կարելի ասել միջուկային զենքի մասին: ԱՄՆ ԶՈւ շտաբի պետերի միացյալ խորհրդի փոխնախագահ, գեներալ Փոլ Սելվայի փոխանցմամբ՝ հաջորդ սերնդի սպառազինությունը ներառելու է անհամեմատ փոքր ծավալների միջուկային մարտագլխիկներ, որոնք հնարավորություն կտան կիրառել դրանք ամենօրյա խնդիրների լուծման ընթացքում:
«Փոքր միջուկային ռումբերը հնարավորություն կտան ԱՄՆ-ին համարժեք պատասխան տալ ցանկացած տեսակի միջուկային հարձակմանը», - նշել է գեներալ Սելվան՝ ընդգծելով, որ այժմ խոշորամասշտաբ միջուկային հարվածի դեպքում գրանցվելիք մարդկային կորուստները ԱՄՆ նախագահներին սահմանափակում են իրենց գործողությունների մեջ:
Ամերիկյան գիտնականների դաշնության՝ Միջուկային տեղեկատվության նախագծի տնօրեն Հանս Քրիսթենսենի տեղեկություններով՝ ԱՄՆ զինված ուժերն այսօր իրենց տրամադրության տակ ունեն շուրջ 1000 միջուկային մարտագլխիկ, որոնք կարող են փոխարկվել փոքրածավալ ռումբերի: Բացի դրանից, չի բացառվում նաև նոր ռումբերի ստեղծումը:
Հատկանշական է, որ հաջորդ սերնդի նման սպառազինության ստեղծումը ԱՄՆ-ից բացի նաև այլ երկրների օրակարգում է: Նման հետաքրքրություն են ցուցաբերում Ռուսաստանը, որը սպառնում էր նման ռումբեր կիրառել ՆԱՏՕ-ի զորքերի՝ Ղրիմ հնարավոր ներխուժման դեպքում, ինչպես նաև Հյուսիսային Կորեան: