Միջուկային պատերազմի հետևանքները (տեսանյութ)
Տվյալների գրաֆիկական պատկերման մասնագետ Նեյլ Հելորանը հրապարակել է իր պատրաստած տեսանյութը, որտեղ գնահատվում է միջուկային պատերազմի հետևանքով մարդկային զոհերի չափը։ Տեսանյութը տեղ է գտել Gizmodo պարբերականում։
Անիմացիան ցույց է տալիս, թե ինչպես է բնակչության թիվը տարեցտարի փոխվում, ինչքան մարդ է ծնվում և ինչքան՝ մահանում։ Ցույց է տրվում նաև, թե ամեն տարի ինչքան մարդ է մահացել ողջ 20-րդ դարի ընթացքում՝ ներառյալ համաշխարհային պատերազմների ընթացքում զովածները։ Դրանք, սակայն, անհամեմատելի են միջուկային հարվածի հետևանքների հետ։
Հեղինակը ներկայացրել է Հիրոսիմա և Նագասակի քաղաքներում ատոմային ռումբի հետևանքով զոհվածների թիվը, ինչպես նաև այժմյան միջուկային մարտագլխիկների հզորությունը, որոնք երրորդ համաշխարհային պատերազմի դեպքում թիրախներ կխոցեն ԱՄՆ-ում, Ռուսաստանում և Եվրոպայում։
Հելորանի հաշվարկներով՝ մոտ 500 միլիոն մարդ կզոհվի միջուկային հարվածների փոխանակման առաջին երեք շաբաթների ընթացքում։ Զոհերի մնացած մասը հնարավոր չի եղել որոշել՝ հաշվի առնելով միջուկային ձմռան անկանխատեսելի հետևանքները։
>