Շարլոթսվիլլում բազմությանը վրաերթի ենթարկած երիտասարդը ոգեշնչված է եղել նացիստական գաղափարներով

ԱՄՆ-ի Շարլոթսվիլլում բազմության մեջ մխրճված երիտասարդի՝ Ջեյմս Ալեքս Ֆիլդս կրտսերի ուսուցիչը հայտնել է, որ նա միշտ էլ հիացել է նացիզմի գաղափարախոսությամբ և Ադոլֆ Հիտլերով. ուսուցչի խոսքերը փոխանցում է The Washington Post-ը:

«Ֆիլդսը ազգայնամոլական գաղափարներ է ունեցել»,- ասել է նա:

Ինչպես նշում է RT-ն, Ֆիլդս կրտսերն անգամ հետազոտական աշխատանք է գրել Երկրորդ համաշխարհային պատերազմի ժամանակ նացիստների զինված ուժերի մասին:

«Ակնհայտ էր, որ նա տարված է ազգայնամոլությամբ և խոնարհվում էր Ադոլֆ Հիտլերի անձի առջև: Նա հավատարիմ էր սպիտակամորթների գերակայության մասին հայացքներին: Նա իրոք հավատում էր դրան»,- պատմել է ուսուցիչը:

Նշենք, որ օգոստոսի 12-ին Ջեյմս Ալեքս Ֆիլդս կրտսերն իր Chevrolet Camaro մակնիշի ավտոմեքենայով վրաերթի էր ենթարկել Շարլոթսվիլլում հավաքվածներին, որոնք բողոքի ցույց էին անցկացնում Կոնֆեդերացիայի բանակի գեներալ Ռոբերտ Լիի արձանի ապամոնտաժման դեմ: Միջադեպի պատճառով մահացել է մի կին, 19 մարդ ստացել է տարբեր աստիճանի մարմնական վնասվածքներ:

Արձանի ապամոնտաժմանը դեմ են հանդես եկել աջամետ ծայրահեղական շարժումների կողմնակիցները: Բողոքի ցույցի համար քաղաք են ժամանել հազարավոր ցուցարարներ, ինչպես նաև նրանց հակառակորդները, որոնք փորձել են խանգարել միջոցառմանը:

RT-ի փոխանցմամբ՝ առաջին բողոքի ցույցերն սկսվել են օգոստոսի 11-ին, երբ նացիզմի կողմնակիցները ջահերով երթ էին կազմակերպել: Ցուցարարները ուղևորվել էին դեպի «Ազատության զբոսայգի», որտեղ տեղադրված է արձանը. այստեղ էլ տեղի են ունեցել նրանց և ձախամետների բախումները:

Իրավիճակի սրման հետևանքով՝ քաղաքի իշխանությունները արտակարգ դրություն են հայտարարել:

Հայտնի է դարձել նաև, որ Շարլոթսվիլլի մոտկայքում ոստիկանական ուղղաթիռ է ընկել, որի հետևանքով երկու ոստիկան է զոհվել: Վթարի պատճառները դեռևս հայտնի չեն:

ԱՄՆ-ի նախագահ Դոնալդ Թրամփը հանդես է եկել անկարգությունները դատապարտող խիստ հայտարարությամբ և միասնության կոչ արել: