Ռուսաստանի հատուկ ծառայությունները կանխել են մի շարք ահաբեկչական գործողություններ
ՌԴ Անվտանգության դաշնային ծառայությունը (ԱԴԾ) ձերբակալել է ահաբեկչական խմբավորման անդամների, վերջիններս պատրաստվում էին մի շարք ահաբեկչական գործողություններ իրականացնել Մոսկվայում. ԱԴԾ հայտարարություն փոխանցում է Ռիա Նովոստի-ն:
«ՌԴ ԱԴԾ-ի կողմից Մոսկովյան շրջանում իրականացված օպերատիվ-հետախուզական միջոցառումներից հետո կասեցվել է ահաբեկչական խմբավորման գործունեությունը․ խումբը մտադիր էր ահաբեկչություններ իրականացնել մայրաքաղաքի տրանսպորտային միջոցներում, խոշոր շուկաներում և առևտրի կենտրոններում՝ մահապարտ ահաբեկիչների և հզոր պայթուցիկ սարքերի օգնությամբ»,- ասվում է հայտարարության մեջ:
ԱԴԾ-ի փոխանցմամբ՝ ձերբակալվածների թվում են Ռուսաստանում ԻՊ մի գաղտնի գործակալ, որը պայթուցիկ սարքերի պատրաստման մասնագետ է, և երկու մահապարտ ահաբեկիչ:
Մոսկվայի ծայրամասերում հայտնաբերվել և վնասազերծվել է պայթուցիկ նյութերի և ինքնաշեն պայութցիկների պատրաստման լաբարատորիա: «Նախնական հետախուզական և օպերատիվ գործողություների ընթացքում պարզ է դարձել, որ նախապատրաստվող ահաբեկչական գործողությունները կազմակերպվել էին Իսլամական պետության՝ Սիրիայում գտնվող ղեկավարների և գործակալների կողմից, որոնց թվում են միջազգային հետախուզման մեջ գտնվող Տ. Մ. Նազարովը և Ա.Մ. Շիրինջոնովը՝ ԻՊ-ի ականահատների դպրոցի առաջնորդը»,- հայտնել են ԱԴԾ-ում՝ հավելելով, որ խումբը կազմված է եղել Ռուսաստանի մեկ և Կենտրոնական Ասիայի տարածաշրջանի երկրների երեք քաղաքացիներից:
Նշենք, որ հուլիսի վերջին ԱԴԾ-ին հաջողվել էր կասեցնել կազմակերպվող խոշոր ահաբեկչական գործողություն Սանկտ Պետերբուրգում: Հատուկ ծառայությունների աշխատակիցները ձերբակալել էին Կենտրոնական Ասիայի յոթ քաղաքացու, որոնք հարձակումներ էին նախապատրաստել երկաթուղում և մարդաշատ վայրերում: