«Թալիբան»-ի առաջնորդերից մեկն սպանվել է իր պահակախմբի կողմից

Աֆղանստանի արևելքում իր իսկ պահակախմբի կողմից սպանվել է «Թալիբան» ծայրահեղական շարժման հրամանատարներից մեկը․ այս մասին տեղեկացնում է Pajhwok գործակալությունը:

Տեղական ոստիկանության ներկայացուցչի փոխանցմամբ՝ միջադեպը տեղի է ունեցել օգոստոսի 13-ի լույս 14-ի գիշերը Նանգարհար նահանգի թաղամասերից մեկում: Նրա խոսքով՝ բացի հրամանատար Ֆազալ Սուբհանից, որը հատնի է նաև Կակա Ջի անունով, սպանվել են նաև նրա չորս ուղեկիցները:

Ինչպես նշում է Ռիա Նովոստի-ն, միջադեպի պատճառները դեռևս հայտնի չեն:

Վերջին ամիսներին իրավիճակն Աֆղանստանում զգալիորեն վատթարացել է: «Թալիբան» ծայրահեղական շարժումը, որը բավականին շատ տարածքներ ունի երկրի գյուղական վայրերում, սկսել է հարձակումներ գործել խոշոր քաղաքների վրա: Երկրի տարածքում ուժեղացել է նաև Իսլամական պետության ազդեցությունը: