ՌԴ հատուկ ծառայությունները Ղրիմում ձերբակալել են ուկրաինացի դիվերսանտի

ՌԴ Անվտանգության դաշնային ծառայությունը (ФСБ) Ղրիմում ձերբակալել է ուկրաինական հատուկ ծառայությունների գործակալի, որը մի շարք դիվերսիոն գործողություններ էր ծրագրել։ Այս մասին հայտնում է ԱԴԾ մամուլի ծառայությունը։

Հայտնի է նաև ձերբակալվածի ինքնությունը՝ ոմն Գենադի Լիմեշկո, որը ծնունդով Խարկովի շրջանից է։ Նշվում է նաև, որ ձերբակալվածն ունի ավագ հետախույզի կոչում։

Ղրիմում Լիմեշկոն պետք է վնասեր էլեկտրահաղորդման մի շարք գծեր, հրդեհեր անտառներ և ավտոճանապարհներին ստեղծեր արհեստական սողանքներ։ Նա ձերբակալվել է էլեկտրալարերը վնասելու պահին։

ՌԴ Անվտանգության դաշնային ծառայության տարածած հաղորդագրության մեջ նշվում է, որ ձերբակալվածի մոտ հայտնաբերվել է պայթուցիկ սարք պատրաստելու մեխանիզմ, նռնակներ, ձեռքի սղոց, լուսանկարչական սարք և այլ պարագաներ։

Հարուցվել է քրեական գործ, ընթանում է նախաքննություն՝ պարզելու՝ դիվերսանտի հետ կան արդյոք հանցակիցներ, թե ոչ։