«Թալիբանը» շարժումը Թրամփին կոչ է արել հանել զորքերն Աֆղանստանից

«Թալիբան» ծայրահեղական շարժումը բաց նամակ է ուղղել ԱՄՆ նախագահ Դոնալդ Թրամփին՝ նրան կոչ անելով «ամբողջությամբ դուրս բերել իր զորքերն» Աֆղանստանից. այս մասին տեղեկացնում է Khaama Press-ը:

Նամակում ընդգծվում էր, որ բռնությունը երկրում ուղղակիորեն կապված է օտար զորքերի ներկայության հետ, որոնց շարժումն անվանվել է «օկուպացիոն»: «Թալիբանը» նաև ԱՄՆ-ի ղեկավարած միջազգային կոալիցիային մեղադրել է Աֆղանստանը կործանելու մեջ, որի պատճառով երկիրը դարձել է ամենավտանգավոր վայրերից մեկը:

Ավելի վաղ USA Today թերթը, հղում կատարելով Blackwater մասնավոր ռազմական ընկերության հիմնադիր Էրիկ Փրինսին, գրել էր, որ Սպիտակ տունը քննարկում է Աֆղանստանում ԱՄՆ-ի գործունեության մեծ մասը վարձու զինվորականներին փոխանցելու ծրագիրը: Այն լրջորեն քննարկվել է՝ չնայած նախագահի՝ ազգային անվտանգության հարցերով խորհրդական Հերբերթ Մաքմաստերի և Պենտագոնի ղեկավար Ջեյմս Մեթիսի մտավախություններին:

Փրինսի ծրագրի համաձայն՝ 5,5 հազար վարձու զինվորականներ՝ հիմնականում նախկին հատուկջոկատայիններ կմարզեն աֆղանական զինվորներին ամբողջ երկրով մեկ: Նա նաև նախատեսում է օժանդակել 90 ինքնաթիռներից կազմված մասնավոր զինուժի:

Հիշեցնենք, ոչ 2001 թ. ԱՄՆ-ն սկսել է Աֆղանստանում հակաահաբեկչական ռազմական գործողություն իրականացնել։ Ավելի ուշ երկրում տեղակայվել են ՄԱԿ-ի Անվտանգության խորհրդի՝ անվտանգության ապահովման միջազգային ուժերը (ISAF): ԱՄՆ-ի ղեկավարած կոալիցիան և ISAF-ը պայքարել են «Թալիբան» և «Ալ Քաիդա» խմբավորումների դեմ: 2014 թ. ՆԱՏՕ-ն հանել է իր ուժերն Աֆղանստանից, իսկ 2015 թ. սկզբից նրանց փոխարինելու է եկել «Վճռական աջակցություն» ոչ ռազմական առաքելությունը: