Ստամբուլում իրավապահները ձերբակալել են Եվրոպայում ահաբեկչություններ նախապատրաստող ԻՊ անդամի
Թուրքիայի հատուկ ծառայությունները Ստամբուլում ձերբակալել են Իսլամական պետության մի ահաբեկչի, որը հետախուզման մեջ էր Ինտերպոլի կողմից։ Այս մասին տեղեկացնում է թուրքական NTV Haber-ը։
Իրավապահները հակաահաբեկչական գործողության շրջանակներում պարզել են, որ ձերբակալված զինյալն զբաղվել է ինքնաշեն պայթուցիկների պատրաստմամբ։
Հաղորդվում է, որ ձերբակալվածը ոմն Մեհդի Ա․-ն է, որն ունի բելգիական ծագում։ Նա Ստամբուլ էր ժամանել Եվրոպայում մի շարք ահաբեկչություններ իրականացնելու նպատակով։
Մեհդի Ա․-ն արդեն երեք տարի է, ինչ հետախուզման մեջ է Ինտերպոլի կողմից։ Ձերբակալվածը կասկածվում է եվրոպական քաղաքներում տեղի ունեցած ահաբեկչությունների կազմակերպման հետ կապ ունենալու մեջ։
Նշվում է, որ հետաքննությունից հետո իրավապահներն ահաբեկչին Թուրքիայից կտեղափոխեն Բելգիա։