Բրեքզիթից հետո Մեծ Բրիտանիան ձգտելու է Իռլանդիայի հետ սահմանների հստակեցմանը․ Telegraph
Մեծ Բրիտանիան չի պատրաստվում Եվրամիությունից դուրս գալուց հետո վերադառնալ Իռլանդիայի Հանրապետության հետ «անորոշ սահմաններին». այս մասին տեղեկացրել է The Daily Telegraph թերթը՝ հղում կատարելով Միացյալ Թագավորության կառավարության ծրագրերին:
Բրիտանական իշխանությունները պնդում են, որ ձգտում են խուսափել Մեծ Բրիտանիայի հետ Եվրամիությունից դուրս եկող Հյուսիսային Իռլանդիայի և կառույցում մնացող Իռլանդիայի Հանրապետության սահմանին «ցանկացած ֆիզիակական սահմանային ենթակառուցվածքներից»:
Ինչպես նշում է ՏԱՍՍ-ը, կառավարության ծրագրերի մեջ է մտնում այնպիսի պայմանների ստեղծումը, որոնց դեպքում Իռլանդիայի Հանրապետության և Հյուսիսային Իռլանդիայի միջև առևտրի 80%-ն ապահովող մանր առևտականներն ընդհանրապես ստուգումների չենթարկվեն սահմանին: Իսկ խոշոր առևտրականները նոր համաձայնագրեր կստորագրեն առևտրային գործընկերների վստահելիության վերաբերյալ: Դա կնշանակի, որ գրանցված ընկերությունների տրանսպորտային միջոցները կարող են սահմանը հատել էլեկտրոնային գրանցման ռեժիմով:
Բրեքզիթից հետո մեծ Բրիտանիան նաև պատրաստվում է հետևել 1998 թ. կնքված «Ավագ ուրբաթ» համաձայնագրի կետերին, որը նախատեսում է Լոնդոնի կողմից Հս. Իռլանդիայի անմիջական կառավարումից հրաժարում և իշխանության փոխանցում ինքնակառավարման մարմիններին: