Ֆիլիպիններում ոստիկաններն ավելի քան 30 մարդ են սպանել

Ֆիլիպինների ոստիկանությունը մեկ օրվա ընթացքում 32 մարդու է սպանել Բուլական նահանգում տեղի ունեցած բախումների ժամանակ. գրում է BBC-ն:

Նշվում է, որ սպանվածները թմրադեղերի վաճառքով զբաղվողներ են եղել, որոնք զինված դիմադրություն են ցույց տվել ոստիկաններին:

2016 թ. երկրի նախագահ Ռոդրիգո Դուտերտեն պատերազմ է սկսել թմրանյութերի դեմ. այս ընթացքում հազարավոր մարդիկ են սպանվել երկրում:

Թմրամիջոցների վաճառքի դեմ պայքարը խիստ քննադատության է արժանացել միջազգային հասարակության կողմից՝ սպանությունների քանակի պատճառով. օգոստոսի 15-ին տեղի ունեցած սպանությունների թիվը ռեկորդային է համարվում պայքարի սկզբից ի վեր: Նշվում է նաև, որ ավելի վաղ Դուտերտեն հաստատել է նաև արտադատական սպանությունները:

Մեկ օր տևած բախումների ընթացքում ավելի քան 100 մարդ է ձերբակալվել, առգրավվել են անօրինական թմրադեղեր և զենքեր:

«Ռեկորդային թվով սպանությունները ցույց են տալիս, որ նախագահ Դուտերտեի պատերազմն ավարտվելու միտում չունի», - գրում է BBC-ն:

Չնայած արտադատական սպանություններին՝ շատերը կողմնակից են Դուտերտեի՝ թմրադեղերի դեմ պատերազմին: Մանիլայի բնակիչները BBC-ի թղթակցին հայտնել են, որ փողոցներն ավելի անվտանգ են դարձել:

Իրավապաշտպանները Ֆիլիպինների ոստիկաններին մեղադրել են արտադատական սպանություններ իրականացնելու մեջ: Ոստիկանությունն իր հերթին նշել է, որ կասկածյալներն սպանվել են իրավապահներին դիմադրություն ցույց տալու ժամանակ: