Միացյալ Նահանգները պարտված գերտերություն է․ Ալեքսեյ Պուշկով

Ռուս պատգամավոր Ալեքսեյ Պուշկովը Միացյալ Նահանգներն անվանել է «պարտված գերտերություն»՝ հիշեցնելով Աֆղանստանից ամերիկյան զորքերի դուրսբերման պահանջը․ գրում է Ռիա Նովոստի-ն՝ հղում կատարելով Պուշկովի թվիթերյան գրառմանը։

«ԱՄՆ-ում սկսել են հնչել Աֆղանստանից զորքերը դուրս բերելու կոչեր։ Ջորջ Բուշ կրտսերն սկսել է պատերազմը, Բարաք Օբաման չի կարողացել ավարտել այն, իսկ Թրամփը կանգնած է կոտրած տաշտակի առջև։ Պարտված գերտերություն», - գրել է Պուշկովը։

Հիշեցնենք, որ «Թալիբան» շարժումը բաց նամակ էր հղել Դոնալդ Թրամփին՝ կոչ անելով ամբողջությամբ դուրս բերել ամերիկյան զորքերն Աֆղանստանից։

Ավելի վաղ USA Today թերթը, հղում կատարելով Blackwater մասնավոր ռազմական ընկերության հիմնադիր Էրիկ Փրինսին, գրել էր, որ Սպիտակ տունը քննարկում է Աֆղանստանում ԱՄՆ-ի գործունեության մեծ մասը վարձու զինվորականներին փոխանցելու ծրագիրը: Այն լրջորեն քննարկվել է՝ չնայած նախագահի՝ ազգային անվտանգության հարցերով խորհրդական Հերբերթ Մաքմաստերի և Պենտագոնի ղեկավար Ջեյմս Մեթիսի մտավախություններին:

Փրինսի ծրագրի համաձայն՝ 5,5 հազար վարձու զինվորականներ՝ հիմնականում նախկին հատուկջոկատայիններ կմարզեն աֆղանական զինվորներին ամբողջ երկրով մեկ: Նա նաև նախատեսում է օժանդակել 90 ինքնաթիռներից կազմված մասնավոր զինուժի:

Հիշեցնենք, ոչ 2001 թ. ԱՄՆ-ն սկսել է Աֆղանստանում հակաահաբեկչական ռազմական գործողություն իրականացնել։ Ավելի ուշ երկրում տեղակայվել են ՄԱԿ-ի Անվտանգության խորհրդի՝ անվտանգության ապահովման միջազգային ուժերը (ISAF): ԱՄՆ-ի ղեկավարած կոալիցիան և ISAF-ը պայքարել են «Թալիբան» և «Ալ Քաիդա» խմբավորումների դեմ: 2014 թ. ՆԱՏՕ-ն հանել է իր ուժերն Աֆղանստանից, իսկ 2015 թ. սկզբից նրանց փոխարինելու է եկել «Վճռական աջակցություն» ոչ ռազմական առաքելությունը: