ՄԱԿ-ի Անվտանգության խորհուրդը կոչ է արել ուժեղացնել ահաբեկչության դեմ պայքարը Իսպանիայում տեղի ունեցած հարձակումներից հետո
ՄԱԿ-ի Անվտանգության խորհուրդը դատապարտել է Բարսելոնայում տեղի ունեցած ահաբեկչական գործողությունները: Օգոստոսի 17-ին հրապարակած հայտարարության մեջ խորհուրդն այդ հարձակումն անվանել է «բարբարոսական և ճղճիմ»՝ կոչ անելով ուժեղացնել ահաբեկչության դեմ պայքարը. գրում է ՏԱՍՍ-ը:
Անվտանգության խորհրդի անդամներն ընդգծել են, որ ահաբեկչությունը «միջազգագային խաղաղությանը և անվտանգությանն սպառանցող ամենալուրջ վտանգներից է»․ այն հանցագործություն է համարվում՝ անկախ հետապնդած նպատակներից: «Նրանք իրենց աջակցությունն են հայտնել Իսպանիային՝ ահաբեկչության դեմ պայքարում և ընդգծել ահաբեկչության և բռնի ծայրահեղականության դեմ պայքարում միջազգային ջանքերի ակտիվացման անհրաժեշտությունը»,- ասվում է հայտարարության մեջ:
Ինչպես նշում է ՏԱՍՍ-ը, խորհրդի անդամները հորդորել են գտնել և պատասխանատվության ենթարկել հարձակման կազմակերպիչներին և հովանավորներին՝ նշելով, որ միջազգային իրավունքի համաձայն՝ բոլոր երկրները պարտավորվում են համագործակցել իսպանական իշխանությունների հետ՝ ահաբեկչական գործողության հետաքննման հարցում:
Հիշեցնենք, որ օգոստոսի 17-ի երեկոյան Բարսելոնայի Ռամբլա զբոսաշրջային փողոցում միկրոավտոբուսը մխրճվել էր մարդկանց բազմության մեջ, որի հետևանքով 13 մարդ զոհվել էր, 100-ը՝ վիրավորվել: Ահաբեկչության գործով երկու մարդ է ձերբակալվել: Հարձակման պատասխանատվությունն ստանձնել է Իսլամական պետությունը:
Մի քանի ժամ անց Կատալոնիայի ոստիկանությունը Կամբրիլսում ոչնչացրել է հինգ ահաբեկչի: Նրանք փորձել են նմանատիպ ահաբեկչություն իրականացնել նաև այդ քաղաքում՝ վրաերթի ենթարկելով հետիոտնային ացնման մոտ կանգնած մարդկանց։ Ծանր վիրավորվել էր երկու մարդ, ևս երեքը ստացել էին թեթև մարմնական վնասվածքներ։