ԱՄՆ-ը և Հարավային Կորեան սկսում են համատեղ զորավարժությունները՝ հաշվի չառնելով տարածաշրջանում առկա լարվածությունը
Այսօր՝ օգոստոսի 21-ին, ԱՄՆ-ն և Հարավային Կորեան սկսում են Ulchi-Freedom Guardian համատեղ զորավարժությունները՝ չնայած տարածաշրջանում լարվածության սրացմանը. գրում է ՏԱՍՍ-ը:
Պենտագոնի պաշտոնական ներկայացուցիչ Ծովային հետևակների կորպուսի փոխգնդապետ Քրիստոֆեր Լոգանը և Պետքարտուղարության մամլո ծառայության ղեկավար Հեդեր Նաուրեթը հաստատել էին Վաշինգտոնի՝ զորավարժություններ անցկացնելու մտադրությունները՝ չնայած Կորեական թերակղզում տիրող իրավիճակին:
«Ամբողջ աշխարհը Հյուսիսային Կորեային կոչ է անում դադարեցնել ապակայունացնող գործունեությունը: Խոսքն այն մասին է, որ ամբողջ միջազգային հասարակությունը խոսում է Փհենյանի միջուկային ծրագրի առաջխաղացման և բալիստիկ հրթիռների փորձարկման մասին, որն ապակայունացնում է իրավիճակը ոչ միայն տարածաշրջանում, այլ նաև ամբողջ աշխարհում»,- ասել է Նաուերթը:
Հարավային Կորեայի շտաբների ղեկավարների հանձնաժողովի ներկայացուցիչները հաստատել են, որ զորավարժությունները կանցկացվեն «նույն ծավալով, ինչ անցյալ տարի»: Հիշեցնենք, որ նախորդ տարի Ulchi-Freedom Guardian զորավարժություններին մասնակցել են 50 հազար հարավկորեացի և 25 հազար ամերիկացի զինծառայողներ:
Անցյալ տարիների զորավարժություններին մասնակցել են նաև Ավստրալիան, Մեծ Բրիտանիան, Դանիան, Իտալիան, Կանադան, Կոլումբիան, Նոր Զելանդիան, Ֆիլիպինները և Ֆրանսիան:
Օգոստոսի 17-ին Հյուսիսային Կորեայի կենտրոնական լրատվական գործակալությունը հայտարարություն է տարածել՝ ըստ որի Ulchi-Freedom Guardian զոավարժությունները կսրեն Կորեական թերակղզում տիրող իրավիճակը: «Հարավկորեական կողմը ամբողջությամբ պատասխանատվություն է կրում այն անդառնալի իրավիճակի համար, որին կարող են հանգեցնել այդ ռազմական խաղերը»,- ընդգծել է գործակալությունը:
Իրավիճակը Կորեական թերակղզում ծայրահեղ լարված է մնում Փհենյանի հրթիռային-միջուկային ծրագրի զարգացման պատճառով: Վերջրերս Հյուսիսային Կորեան հայտարարել էր խաղաղօվկիանոսյան Գուամ կղզում գտնվող ամերիկյան ռազմաբազաներին հարված հասցնելու մտադրության մասին: Թրամփն իր հերթին խոստացել էր ձեռնպահ չմնալ պատասխան քայլերից:
Ulchi-Freedom Guardian զորավարժություններն անցկացվում են երկու փուլով: Առաջինի ընթացքում մշակվում են թշնամու կողմից կենսական նշանակության կառույցներին հասցված վնասի վերացման գործողություններ: Երկրորդ փուլում մշակվում են կորեական-ամերիկյան համատեղ գործողություններ՝ Հյուսիսային Կորեայի ներխուժման դեպքում:
Փհենյանը հանդես է գալիս զորավարժությունները քննադատող հայտարարություններով: Վաշինգտոնը ենթադրում է, որ այդ ռազմական գործողությունները նպաստում են Կորեական թերակղզում իրավիճակի կայունացմանը: