ԱՄՆ-ը պատրաստվում է աջակցել աֆղանական իշխանությունների և թալիբների միջև խաղաղ բանակցություններին

ԱՄՆ-ը պատրաստ է օժանդակել Աֆղանստանի կառավարության և «Թալիբան» շարժման միջև խաղաղ բանակցությունների կազմակերպմանը՝ առանց նախապայմանների. այս մասին հայտնել է ԱՄՆ-ի պետքարտուղար Ռեքս Թիլերսոնը՝ Թրամփի կողմից Աֆղանստանի նկատմամբ նոր ռազմավարության վերաբերյալ հայտարարությունից հետո:

«Մենք պատրաստ ենք աջակցել Աֆղանստանի կառավարության և «Թալիբան» շարժման միջև խաղաղ բանակցությունների կազմակերպմանը՝ առանց որևիցե նախապայմանների: Մենք ակնկալում ենք, որ միջազգային հասարակությունը՝ նախ և առաջ Աֆղանստանի հարևանները կօգնեն մեզ խաղաղ կարգավորման հարցում»,- ընդգծել է Թիլերսոնը:

Պետքարտուղարի գնահատմամբ՝ Վաշինգտոնի նոր ռազմավարությունն արմատապես տարբերվում է «նախորդ մոտեցումներից, որոնք հիմնված էին որոշակի խնդիրների լուծման համար նշանակված արհեստական վերջնաժամկետների վրա»:

«Մենք պարզ ասում ենք «Թալիբան»-ին, որ նրան չի հաջողվի հաղթել պատերազմում: Սակայն «Թալիբան»-ը կարող է խաղաղության և քաղաքական օրինականության հասնել՝ բանակցությունների օգնությամբ քաղաքական կարգավորման և պատերազմի դադարեցման միջոցով»,- նշել է նա:

Թիլերսոնը հավաստիացրել է Քաբուլին և Աֆղանստանի անվտանգության ծառայություններին, որ «Վաշինգտոնը կշարունակի աջակցություն ցուցաբերել ահաբեկչության դեմ պայքարում և երկրում ահաբեկիչների և ծայրահեղականների նոր հենակետերի առաջացման կախարգելման հարցում»:

Ինչպես նշում է ՏԱՍՍ-ը, օգոստոսի 21-ի երեկոյան Թրամփը հանդես է եկել «բանակին և Ամերիկայի ժողովրդին ուղղված» հատուկ ուղերձով՝ «ներկայացնելով Աֆղանստանում և Հարավային Ասիայում ԱՄՆ-ի հետագա քայլերի մասին նոր ծրագիրը»:

ԱՄՆ-ի պետքարտուղարի խոսքով՝ նոր ինտեգրված մոտեցումը «պահանջում է Պակիստանի, Աֆղանստանի և Հնդկաստանի դիվանագիտական աջակցությունը՝ տարածաշրջանում կայունություն հաստատելու համար»:

Դոնալդ Թրամփի՝ Վաշինգտոնի նոր ռազմավարության մասին հայտարարության նախօրեին Թիլերսոնը հեռախոսազրույց էր ունեցել Աֆղանստանի և Հնդկաստանի  արտգործնախարարներ Սալահուդին Ռաբանիի և Սուշմա Սվարաջի, ինչպես նաև Պակիստանի վարչապետի ժամանակավոր պաշտոնակատար Շահիդ Հական Աբասի հետ: