Հազարավոր մուսուլմաններ դուրս են եկել Բարսելոնայի փողոցներ՝ ահաբեկչության դեմ բողոքի ցույցի
Մոտ 2,5 հազար մուսուլմաններ ահաբեկչության դեմ բողոքի ցույց են կազմակերպել Բարսելոնայում: Երթն սկսվել է «Պլազա դե Կատալունյայից», որտեղ իսլամիստ ահաբեկիչը մեքենայով մխրճվել էր մարդկանց բազմության մեջ՝ սպանելով 14 և վիրավորելով ավելի քան 100 մարդու. գրում է RT-ն:
Ինչպես նշում է El Pais-ը, հրապարակում հավաքված մարդիկ՝ իսլամական երեք համայնքերի ներկայացուցիչները, կատալոներենով, իսպաներենով և արաբերենով պաստառներ են ունեցել, որոնցով դատապարտել են բռնությունը և առաջարկել իրենց օգնությունը հարձակումից տուժածներին: Ցուցանակների վրա գրված են եղել հետևյալ կարգախոսները՝ «Մենք նույնպես զոհ ենք», «Ահաբեկչությունը կրոն չի ճանաչում», «Մենք բոլորս Բարսելոնան ենք, ոչ թե ահաբեկչությունը», «Մենք մուսուլմաններ ենք, ոչ թե ահաբեկիչներ» և այլն:
Հատկանշական է, որ ցույցին մասնակցել են որոշ տեղացի քաղաքական գործիչներ՝ Կատալոնիայի խորհրդարանի նախագահը, արտաքին գործերի քարտուղարը, Բարսելոնայի քաղաքապետի տեղակալը և կատալոնական խոհրդարանի բոլոր կուսակցությունների ներկայացուցիչները:
Հիշեցնենք, որ օգոստոսի 17-ին ֆուրգոնի վարորդը վրաերթի էր ենթարկել հրապարակի մոտակայքում եղած մարդկանց բազմությանը: Ավելի ուշ պարզվել էր նրա ինքնությունը՝ Մարոկկոյի 22-ամյա քաղաքացի Յունես Աբույաքուբ:
Օգոստոսի 21-ին իսպանական ոստիկանությունը հայտնել էր, որ մեղադրյալն սպանվել է Բարսելոնայից ոչ հեռու գտնվող Սուբիրաթսի գազալցակայանում:
Կատալոնական իշխանությունների փոխանցմամբ՝ ահաբեկչական գործողության մեջ ներքաշված բոլոր 12 մասնակիցները կամ սպանվել են, կամ գտնվում են ոստիկանության հսկողության տակ: