Դոհան վերականգնում է Թեհրանի հետ դիվանագիական հարաբերությունները
Կատարը վերականգնում է Իրանի հետ դիվանագիտական հարաբերությունները՝ անտեսելով արաբական երկրների պահանջները. գրում է ABC News-ը:
Պարբերականի փոխանցմամբ՝ Դոհան Թեհրան է ուղարկել 2016 թ. Սաուդյան Արաբիայի դեսպանատան վրա կատարված հարձակումից հետո այնտեղից հետ կանչված դեսպանին:
«Կատարն ապացուցեց, որ ուրիշ ուղղությամբ է շարժվում: Այս քայլը ցույց է տալիս, որ Կատարը չի խոնարհվի իր վրա դրված տարածաշրջանային ճնշման տակ»,- այսպիսի կարծիք է հայտնել ամերիկացի քաղաքագետ Ջեյմս Բեքերը:
Կատարի արտգործնախարար հայտնել է, որ կառավարությունը ցանկանում է բարելավել Իրանի Իսլամական Հանրապետության հետ երկկողմ հարաբերությունները:
Իրանական պետական լրատվամիջոցները տարածել են այս լուրերը՝ այլ մանրամասներ չներկայացնելով:
Ինչպես նշում է ABC News-ը, չնայած 2016 թ. դեսպանին հետ կանչելուն, Իրանը և Կատարը պահպանել էին իրենց արժեքավոր առևտրային հարաբերությունները: Երկու երկրները կիսում են հսկայական օֆշորային գազի հանքեր, որը Թեհրանում անվանում են «Հարավիրանական դաշտ», իսկ Դոհայում՝ «Հյուսիսային դաշտ»:
Այդ հանքերի պաշարները Կատարին դարձրել են աշխարհում ամենաշատ եկամուտ ունեցող երկիրը. այդ շահույթներով են ֆինանսավորվում «Ալ Ջազիրա» ազգային հեռուսատաընկերությունը և 2022 թ. ֆուտբոլի Աշխարհի առաջնությունը:
Դիվանագիտական ճգնաժամի սկզբից ի վեր Իրանը նավերով սնունդ է հասցրել Կատարին, որը Սաուդյան Արաբիայի կողմից ցամաքային շրջափակման մեջ էր: Դա էլ ավելի է սրել առանց այդ էլ լարված իրավիճակը տարածաշրջանում:
Արաբական երկրները դեռևս չեն արձագանքել Կատարի որոշմանը: Չադի Կենտրոնաաֆրիկյան Հանրապետությունը հայտարարել է, որ կփակի Դոհայում իր դեսպանատունը՝ Կատարին մեղադրելով հարևան Լիբիայում իրավիճակն ապակայունացնելու մեջ:
Հիշեցնենք, որ Պարսից ծոցի ավազանում ճգնաժամն սկսվել է հունիսի 5-ին, երբ Բահրեյնը, Եգիպտոսը, Սաուդյան Արաբիան և ԱՄԷ-ն, Կատարին մեղադրելով ահաբեկչությանն աջակցելու և Իրանի հետ մտերիմ լինելու մեջ, խզեցին դիվանագիտական հարաբերությունները նրա հետ:
Ավելի ուշ բոյկոտող երկրները Կատարին ներկայացրին 13 պահանջներից բաղկացած ցուցակ, որը սակայն չընդունվեց Դոհայի կողմից: