Լեհաստանը Գերմանիայից փոխհատուցում է պահանջում Երկրորդ համաշխարհային պատերազմի ժամանակ պատճառած վնասի դիմաց

Լեհաստանի վարչապետ Բեատա Շիդլոն հայտարարել է, որ Վարշավան կարող է Բեռլինից հատուցում պահանջել Երկրորդ համաշխարհային պատերազմի ժամանակ պատճառած վնասի դիմաց. գրում է Ռիա Նովոստի-ն:

«Մենք Երկրորդ համաշխարհային պատերազմի զոհերն ենք, այն զոհերը, որոնք երբեք փոխահատուցում չեն ստացել»,- հայտարարել է Շիդլոն՝ նշելով, որ այդ փոխհատուցումը «հիշեցում է արդարության մասին»: Ընդ որում՝ վարչապետն այս գաղափարի բոլոր քննադատներին կոչ է արել «նայել պատմությանը և հիշել, թե ինչ է կատարվել լեհական հողում պատրազմի ժամանակ»:

Ավելի վաղ նմանատիպ հայտարարություններով էին հանդես եկել Լեհաստանի պաշտպանության և արտաքին գործերի նախարարները:

1945 թ. Պոտսդամի համաժողովի ընթացքում հետպատերազմական կարգավորման և տարածքային պահանջներին վերաբերող քննարկումների արդյունքում Լեհաստանն ստացել է պարտված Գերմանիայից առանձնացած Պոմերանիան, Սիլեզիան և Արևելյան Պրուսիայի 2/3-ը, սակայն տարածքներ է կորցրել Արևմտյան Ուկրաինայում և Բելառուսում:

Ավելի վաղ Dziennik լրատվականը տեղեկացրել էր, որ լեհական սեյմի պատգամավորները հանդես են եկել Ռուսաստանից «ԽՍՀՄ-ի կատարած հանցանքների դիմաց տրիլիոն ոսկեդրամներ» ստանալու պահանջով:

Իշխող կուսակցության անդամներից մեկը պնդել է, որ «ռուսները թալանել են արդյունաբերությունը և արվեստի գործերը», և այժմ Մոսկվան պետք է Վարշավային «ռազմական փոխհատուցում» վճարի:

Քաղաքագետ, լրագրող Յուրի Սվետովը նշել է, որ սովորաբար փոխհատուցումը դրվում է պարտված կողմի վրա, իսկ այժմ այն պահանջում են հաղթող կողմից, որն էլ կրել է ամբողջ պատերազմի ծանրությունը:

Մեկ այլ փորձագետի կարծիքով՝ լեհ պատգամավորների՝ խորհրդային բանակին զրպարտելու գաղափարը քաղաքական նպատակ է հետապնդում: «Այն օրինական հիմքեր չունի, ուստի անհրաժեշտ է հորինել դրանք: Սա զուտ քաղաքական ակցիա է, որը չի համապատասխանում միջազգային իրավունքի ոչ մի նորմի»,- նշել է փորձագետը:

Ավելի վաղ Լեհաստանի նախագահ Անդժեյ Դուդան ուղղումներ էր կատարել կոմունիզմի արգելքի մասին օրենքում՝ նախատեսելով սովետական արձանների տեղահանումը: ՌԴ ԱԳՆ-ում այս որոշումը համարեցին սադրանք, որն անհետևանք չի մնա:

Հուլիսին Լեհաստանի Ազգային հիշատակի ինստիտուտը հայտարարել էր, որ սովետական բանակի օգնությամբ գերմանական զորքերից Լեհաստանի ազատումը հրապարակվել է ՌԴ ՊՆ-ի կողմից՝ Կարմիր բանակը միայն որպես փրկիչ ներկայացնելու համար: Լեհաստանի ԱԳ նախարար Անտոն Մաչերևիչը ԽՍՀՄ-ին մեղադրել էր նացիստական Գերմանիայի հետ գաղտնի դավադրություն պատրաստելու մեջ: Նրա խոսքով՝ ԽՍՀՄ-ը և Գերմանիան միասին են հարձակում գործել Լեհաստանի վրա:

Նշենք, որ խորհրդային ուժերը գերմանական շրջափակումից ազատել են Լեհաստանը Վիսլո-Օդերյան ռազմվարական հարձակողական գործողության արդյունքում: Կարմիր բանակը մեծ կորուստներ է կրել. զոհվել է մոտ 600 հազար զինվոր և սպա, որոնք թաղվել են լեհական տարածքում: