Առողջական խնդիրներ ունեն Կուբայում ԱՄՆ դեսպանատան 16 աշխատակիցներ․ Պետքարտուղարություն

ԱՄՆ-ի իշխանությունները հայտնել են, որ տուժել է Կուբայում ամերիկյան դեսպանատան 16 աշխատակիցների առողջությունը՝ արտաքին անհայտ ազդեցության պատճառով. այս մասին տեղեկացրել է Պետքարտուղարության մամլո ծառայության ղեկավար Հեդեր Նաուերթը:

«Մենք տեղեկություն ենք ստացել ավելի քան 16 տուժածների մասին, որոնք տարբեր ախտանիշներ ունեն: Նրանց բժշկական օգնություն է ցուցաբերվել ԱՄՆ-ում և Կուբայում: Մենք շատ լուրջ ենք վերաբերում այս իրավիճակին»,- հայտնել է Նաուերթը՝ հավելելով, որ նրանցից ոմանք այնուամենայնիվ շարունակում են աշխատել Կուբայում:

«Ներկա պահին մենք որևէ մեկի վրա պատասխանատվություն չենք դնում: Հետաքննությունը շարունավում է»,- նշել է Պետքարտուղարության ներկայացուցիչը՝ հավելելով, որ ամերիկյան կառավարությունը ենթադրում է, թե Հավանայում ԱՄՆ-ի դեսպանատան անձնակազմի առողջության վատթարացումն սկսվել է նախորդ տարվա վերջից:

Ընդ որում՝ նա հայտնել է, որ Կուբայում հավատարմագրված դիվանագետների վրա արտաքին ազդեցությունները դադարել են: Այդուհանդերձ Նաուերթի ունեցած տվյալների համաձայն՝ կատարվածի պատճառները դեռևս չեն պարզվել:

Այդուհանդերձ, նա հրաժարվել է մեկնաբանել CBS հեռուստաընկերության տարածած լուրերն այն մասին, թե Կուբայում աշխատող ամերիկացի և կանադացի դիվանագետների մոտ բժիշկները «գլխուղեղի և կենտրոնական նյարդային համակարգի թեթև վնասվածքներ են» հայտնաբերել, որոնք ենթադրաբար առաջացել են որոշակի ձայնային սարքերի ազդեցության հետևանքով: