Գերմանիան չի պատրաստվում վերանայել Լեհաստանին փոխհատուցում տալու հարցը

Գերմանիայի կառավարությունը փակված է համարում Լեհաստանին փոխհատուցում տալու հարցը. այս մասին տեղեկացրել է Ռիա Նովոստի-ն՝ հղում կատարելով նախարարների պալատի մամլո ծառայության ներկայացուցչի հայտարարությանը:

Գործակալության զրուցակիցն ընդգծել է, որ Բեռլինի տեսակետը ձևավորվել է օգոստոսի 2-ին և անփոփոխ է մնում: Այն ժամանակ կառավարության պաշտոնական ներկայացուցիչ Ուլրիկե Դեմերը ասել էր, որ Բեռլինն անշուշտ պատասխանատվություն է կրում Երկրորդ համաշխարհային պատերազմի սանձազերծման համար՝ բարոյական, քաղաքական և ֆինանսական առումներով, սակայն «Վարշավային գերմանական փոխհատուցումների հարցը վերջնականապես լուծվել է անցյալում՝ քաղաքական և իրավական մակարդակով»: Մամլո ծառայությունում ընդգծել են, որ դա գերմանական կառավարության սկզբունքային դիրքորոշումն է:

Ավելի վաղ Լեհաստանի վարչապետ Բեատա Շիդլոն հայտարարել էր, որ Վարշավան իրավունք ունի Բեռլինից հատուցում պահանջելու: «Լեհաստանը խոսում է արդարության մասին: Մենք Երկրորդ համաշխարհային պատերազմի զոհերն ենք, այն զոհերը, որոնք երբեք փոխահատուցում չեն ստացել»,- հայտարարել է Շիդլոն:

Օգոստոսի 2-ին Լեհաստանի պաշտպանության նախարար Անտոնի Մաչերևիչը հիշեցրել էր, որ Վարշավան երբեք փաստացի չի հրաժարվել Բեռլինին պահանջներ ներկայացնելուց, որը 1939 թ. սեպտեմբերի 1-ից սկսել է իր երկրի նկատմամբ ռազմական ագրեսիան, ապա 5 տարվա ընթացքում գրավել լեհական տարածքները:

«Ճիշտ չէ, որ լեհական կառավարությունը հրաժարվել է իրեն նշանակված գերմանական ռազմական փոխհատուցումից: Լեհաստանի Ժողորդական Հանրապետություն կոչվող այդ սովետական գաղութը հրաժարվել է ոչ պակաս խամաճիկային պետության՝ այսպես կոչված Գերմանական Դեմոկրատական Հանրապետության տրամադրած փոխհատուցման մի մասից»,- հայտարարել է նախարարը՝ հավելելով, որ մերժումը երբեք իրավական ձևակերպում չի ստացել: