Պենտագոնը տեղեկացրել է Հյուսիսային Կորեայից մի քանի բալիստիկ հրթիռների արձակման մասին

ԱՄՆ-ի զինված ուժերն արձանագրել են Հյուսիսային Կորեայից փոքր հեռահարության երեք բալիստիկ հրթիռների արձակումը. ԱՄՆ-ի զինված ուժերի Խաղաղօվկիանոսյան հրամանատարության ներկայացուցիչ Դեյվ Բենհեմի հայտարարությունը փոխանցում է ՏԱՍՍ-ը:

«Խաղաղօվկիանոսյան հրամանատարությունն արձանագրել է, որ, ինչպես մենք ենք ենթադրում, Հս. Կորեայից մի քանի հրթիռային մեկնարկ է կատարվել Հավայան կղզիների ժամանակով՝ 11:49-ի և 12:19-ի սահմաններում (01:49-ի և 02:49-ի Երևանի ժամանակով): Նախնական ստուգումների համաձայն՝ խոսքը փոքր հեռահարության երեք հրթիռների մասին է. ընդ որում՝ նրանցից մեկը պայթել է մեկնարկից գրեթե անմիջապես հետո»,- հայտնել է նա:

Խաղաղօվկիանոսյան հրամանատարությունում հայտնել են նաև, որ, ըստ Հյուսիսային Ամերիկայի ավիատիեզերական պաշտպանության միասնական հրամանատարության, արձանագրված «հրթիռային արձակումները սպառնալիք չեն ներկայացրել Հյուսիսային Ամերիկայի» կամ Գուամի համար:

Կորեական թերակղզում իրավիճակը լարված է մնում՝ Փհենյանի հրթիռամիջուկային ծրագրի առաջխաղացման ֆոնին: Հուլիսին Հս. Կորեան երկու բալիստիկ հրթիռի փորձարկում էր իրականացրել, որը սուր արձագանքի էր արժանացել ԱՄՆ-ի, Ճապոնիայի և Հարավային Կորեայի կողմից: Վաշինգտոնը բազմիցս նշել է, որ այս հակամարտության մեջ չի բացառում գործողությունների ոչ մի տարբերակ, այդ թվում և՝ ռազմական: