Կիմ Չեն Ընը վերջին հրթիռային փորձարկումն անվանել է Գուամին հասցվելիք հարվածի նախապատրաստություն
Օգոստոսի 29-ին Հյուսիսային Կորեան միջին հեռահարության «Հվասոն-12» բալիստիկ հրթիռի հաջող փորձարկում է իրականացրել: Ինչպես նշվում է KCNA գործակալության տարածած հայտարարության մեջ, երկրի առաջնորդ Կիմ Չեն Ընն այս արձակումն անվանել է խաղաղօվկիանոսյան Գուամ կղզու ամերիկյան ռազմաբազաներին հասցվելիք հարվածի նախապատրաստական փուլերից մեկը:
«Կիմ Չեն Ընը շատ գոհ է եղել հաջող փորձարկումից: Նա նշել է, որ այս հրթիռային փորձարկումները Կորեական ազգային բանակի ռազմական գործողության առաջին քայլերն են Խաղաղ օվիկանոսում՝ ուղղված Գուամի ռազմաբազայի զսպմանը»,- ասվում է հայտարարության մեջ: Բացի այդ՝ Հս. Կորեայի առաջնորդը հրամայել է շարունակել նմանատիպ հրթիռային արձակումների իրականացումը Խաղաղ օվկիանոսի ենթադրյալ թիրախների ուղղությամբ:
Գործակալության փոխանցմամբ՝ բալիստիկ հրթիռի փորձարկումը պատասխան հարված է ԱՄՆ-ի և Հարավային Կորեայի համատեղ Ulchi-Freedom Guardian զորավարժություններին:
Օգոստոսի սկզբին գործակալությունը տեղեկություն էր տարածել Գուամ կղզու ջրային տարածքին հարված հասցնելու վերաբերյալ հյուսիսկորեական ռազմական ծրագրի մշակման մասին: Դրանում նշվում էր, որ «Հվասոն-12» տեսակի չորս հրթիռներ պետք է թռչեն մոտ 3,4 հազար կմ՝ անցնելով ճապոնական Սիմանե, Հիրոսիմա և Կոտի նահանգների վրայով, և ընկնեն Գուամից 30-40 կմ հեռավորության վրա: