Ամերիկացի զինծառայողները փոխհրաձգության մեջ են մտել Սիրիայի թուրքամետ ընդդիմադիր ջոկատների հետ

Սիրիայում գտնվող ամերիկացի զինծառայողները հարձակման են ենթարկվել և փոխհրաձգության մեջ մտել Թուրքիայի կողմից աջակցություն ստացող սիրիական ընդդիմության հետ։ Այս մասին հայտնում է «Ռոյթերս» լրատվական գործակալությունը՝ կղում կատարելով ԱՄՆ-ի ցամաքային զորքերի գնդապետ Ռայան Դիլոնի հայտարարությանը։

«Մեր զինծառայողները պատասխան կրակ են բացել իրենց վրա հարձակված ընդդիմադիրների ուղղությամբ, այնուհետև տեղափոխվել ավելի ապահով շրջան», - ասել է ամերիկացի գնդապետը։

Ինչպես նշում է CNN-ը, ամերիկացի զինծառայողների և Սիրիայի պրոթուրքական ընդդիմադիր ջոկատների միջև փոխհրաձգությունը տեղի է ունեցել օրեր առաջ՝ Սիրիայի հյուսիսային Մանբիջ քաղաքում, որը գտնվում է Թուրքիայի հետ սահմանին։ Բախումների արդյունքում զոհեր կամ վիրավորներ չեն գրանցվել։

Հատկանշական է, որ միջադեպը տեղի է ունեցել ԱՄՆ պաշտպանության նախարար Ջեյմս Մեթիսի՝ Թուրքիա այցելության ժամանակ, որտեղ վերջինս բանակցություններ է ունեցել թուրք գործընկերոջ՝ Նուրեթին Ջանիկլիի և նախագահ Ռեջեփ Թայիփ Էրդողանի հետ։