Մեծ Բրիտանիայի վարչապետը Պեկինին կոչ է արել ճնշում գործադրել Փհենյանի վրա

Մեծ Բրիտանիայի վարչապետ Թերեզա Մեյը կարծում է, որ Հյուսիսային Կորեայի կողմից եկող սադրանքները զսպելուն ուղղված միջազգային հասարակության փորձերում առանցքային դերը պատկանում է Չինաստանին, և Պեկինին կոչ է անում ուժեղացնել հրթիռային փորձարկումների դադարեցմանն ուղղված ճնշումները. այս մասին տեղեկացրել է «Ռոյթերս» գործակալությունը:

«Մենք ցանկանում ենք համոզված լինել, որ Հս. Կորեան ձեռնպահ կմնա նմանատիպ գործողություններից: Մենք կարծում ենք, որ դա անելու լավագույն ձևը Չինաստանի կողմից Հյուսիսային Կորեայի վրա ճնշում գործադրելն է»,- հայտարարել է վարչապետը Ճապոնիայի մեկնելու ճանապարհին, որտեղ նա հանդիպելու է ճապոնացի գործընկեր Սինձո Աբեի հետ:

Ավելի վաղ Մեյն իր պաշտոնական ներկայացուցչի միջոցով դատապարտել էր Հյուսիսային Կորեայի բալիստիկ հրթիռի արձակումը՝ հայտարարելով, որ «վրդովված է Փհենյանի անխոհեմ սադրանքով»:

Ինչպես նշում է ՏԱՍՍ-ը, օգոստոսի 29-ին Հս. Կորեան բալիստիկ հրթիռի նոր փորձարկում է իրականացրել, որը թռել է Ճապոնիայի հյուսիսարևելյան հատվածի վրայով և ենթադրաբար ընկել Խաղաղ օվկիանոսը՝ Հոկայդո կղզում գտնվող Էրիմո հրվանդանից 1180 կմ դեպի արևելք: Հարավկորեական զինվորականները նշում են, որ հրթիռի թռիչքի հեռավորությունը կազմել է 2,7 հազար կմ, իսկ բարձրությունը՝ 550 կմ: