«Հարվի» փոթորկի հետևանքով զոհվածների թիվը հասել է 44-ի

ԱՄՆ-ի Տեխաս և Լուիզիանա նահանգները պատուհասած «Հարվի» փոթորկի պատճառով զոհվածների թիվն արդեն հասել է 44-ի։ Այս մասին հայտնում է «Ռոյթերս» լրատվական գործակալությունը։ Ավելի վաղ հաղորդվում էր 39 զոհի մասին։

Associated Press գործակալության փոխանցմամբ՝ Տեխասի խոշորագույն Հյուստոն քաղաքում դիահերձարաններն արդեն չեն բավականացնում, և նահանգային իշխանություններն զբաղվում են լրացուցիչ տեղեր ստեղծելու հարցով։ Այս անելանելի իրավիճակը կապված է այն բանի հետ, որ քաղաքային թաղման բյուրոն ջրհեղեղի պատճառով գրեթե չի գործում։   

ԱՄՆ փոխնախագահ Մայք Փենսը հայտարարել է, որ «Հարվի» փոթորիկից հետո պետական օգնություն ստանալու համար գրանցվել է 310 հազար մարդ։ Փենսի խոսքով՝ իշխանություններն օգնության համար արդեն տրամադրել են 530 միլիոն դոլար։

Մեքսիկական ծոցում ձևավորված չորրորդ կարգի «Հարվի» փոթորիկը հարվածել է Տեխասին օգոստոսի 26-ի գիշերը: Այն աստիճանաբար նվազել է՝ հասնելով մրրիկի, ապա՝ այսպես կոչված «արևադարձային դեպրեսիայ» աստիճանի: Այժմ այս մթնոլորտային երևույթը հասել է Լուիզիանա նահանգ և շարունակում է շարժվել դեպի մայրցամաքի խորքը: