Կատալոնիայում 38 մարդ է տուժել ոստիկանության հետ բախումների արդյունքում
Կատալոնիայի առողջապահության նախարարությունը տեղեկացնում է, որ 38 մարդ է տուժել անկախության հանրաքվեի ընթացքում ոստիկանների և քաղաքացիների միջև տեղի ունեցած բախումների արդյունքում։
«Շտապօգնության ծառայության աշխատակիցներն օգնություն են ցուցաբերել 38 տուժածի, որոնք վնասվածքներ են ստացել ոստիկանության հետ բախումների հետևանքով։ Նրանցից երեքի վիճակը գնահատվում է միջին ծանրության․ մնացածը ստացել են թեթև վնասվածքներ», - ասվում է Կատալոնիայի առողջապահության նախարարության թվիթերյան գրառման մեջ։
Նշվում է, որ տուժածերից 9-ը տեղափոխվել է հիվանդանոց։
Կատալոնիայի կառավարության ղեկավար Կարլոս Պուչդեմոնը, որն արդեն կատարել է իր քվեարկությունը, ոստիկանության գործողությունները համարել է «անհիմն և դաժան»։ Նրա խոսքով՝ իրավապահների կողմից բռնություն կիրառելը խոսում է այն մասին, որ անկախության կողմնակիցները հաղթում են։ Նա նաև պահանջել է Իսպանիայի կառավարության հրաժարականը։
Հիշեցնենք, որ այսօր՝ տեղի ժամանակով 09:00-ին (Երևանի ժամանակով՝ 11:00, - խմբ․) Կատալոնիայում սկսվել է անկախության հանրաքվեի քվեարկությունը, որը չեն ընդունում իսպանական իշխանությունները։ Հանրաքվեի անցկացմանը դեմ է նաև երկրի Սահմանադրական դատարանը։ Ոստիկանությունը հաղորդում է, որ իրենց հաջողվել է հսկողության տակ վերցնել 2315 ընտրատեղամասերի մեծ մասը, իսկ Կատալոնիայի իշխանությունները հայտարարում են, որ բաց են ընտրատեղամասերի ավելի քան 70%-ը։
Սոցցանցերում տեղեկություններ են տարածվում, որ որոշ տեղամասերի մոտ բախումների ժամանակ անգամ կրակոցներ են հնչել։
Ավելի վաղ անցկացված սոցհարցումների համաձայն՝ անխակությանը կողմ են քաղաքացիների 41%-ը, 49%-ը ցանկանում է մնալ Իսպանիայի կազմում։ Հանրաքվեի անցկացմանը կողմ է արտահայտվել հարցվածների մոտ 80%-ը, սակայն նրանց մեծ մասը կարծում է, որ ընտրությունների անցկացումը պետք է համաձայնեցնել Մադրիդի հետ։