Wikileaks-ի հիմնադիրը կոչ է անում Իսպանիային հեռացնել ԵՄ կազմից

Wikileaks-ի հիմնադիր Ջուլիան Ասանժը Եվրահանձնաժողովի ղեկավար Ժան Կլոդ Յունկերին կոչ է արել Իսպանիային հեռացնել Եվրամիության կազմից Լիսաբոնյան համաձայնագրի 2-րդ դրույթը կոպտորեն խախտելու համար։ Այս մասին Ասանժը գրել է իր թվիթերյան էջում։

«Հարգելի Ժան Կլոդ Յունկեր, միթե՞ սա է հարգանքը մարդկային արժանապատվության, ազատության և ժողովրդավարության նկատմամբ։ Կիրառեք 7-րդ կետը և հեռացրեք Իսպանիային Եվրամիության կազմից Լիսաբոնյան համաձայնագրի երկրորդ դրույթը խախտելու համար», - գրել է Ասանժը։

Ավելի վաղ նա անկախության հանրաքվեի շուրջ Կատալոնիայում ստեղծված իրավիճակն անվանել էր «աշխարհում առաջին ինտերնետ-պատերազմը»։

Եվրամիության համաձայնագրի երկրորդ կետում նշված է, որ միությունը հիմնված է մարդկային արժանապատվության, ազատության, ժողովրդավարության, հավասարության և օրենքի գերակայության սկզբունքների վրա։

Հիշեցնենք, որ այսօր՝ տեղի ժամանակով 09:00-ին (Երևանի ժամանակով՝ 11:00, - խմբ․) Կատալոնիայում սկսվել է անկախության հանրաքվեի քվեարկությունը, որը չեն ընդունում իսպանական իշխանությունները։ Հանրաքվեի անցկացմանը դեմ է նաև երկրի Սահմանադրական դատարանը։

Քվեարկությանը փորձում են խոչընդոտել իրավապահները։ Ոստիկանության և քաղաքացիների միջև տեղի ունեցած բախումների հետևանքով տուժածների թիվն արդեն հասնում է մոտ 4 տասնյակի։