Հանրաքվեին մասնակցած կատալոնացիների 90%-ը կողմ է անկախությանը

Կատալոնիայում ավարտվել է անկախության հանրաքվեն։ Քվեաթերթիկների հաշվարկից հետո պարզ է դարձել, որ անկախությանը կողմ է քվեարկել 2,02 միլիոն մարդ, կամ քվեարկոթյանը մասնակցած քաղաքացիների 90%-ը։

Այս մասին այսօր՝ հոկտեմբերի 2-ին՝ հանրաքվեի արդյունքներն ամփոփող մամուլի ասուլիսի ընթացքում հայտարարել է Կատալոնիայի կառավարության պաշտոնական ներկայացուցիչ Ժորդի Տուրուլը։

«Իսպանիայից Կատալոնիայի անկախանալուն կողմ է քվեարկել 2.020.144 մարդ, կամ քվեարկությանը մասնակցած քաղաքացիների 90%-ը։ Դեմ է արտահայտվել 176․565 մարդ, կամ քվեարկությանը մասնակցած քաղաքացիների 7%-ը։ Դատարկ քվեաթերթիկների թիվը կազմել է 45․586, իսկ անվավեր է ճանաչվել 20․129 քվեաթերթիկ», - հայտնել է Ժորդի Տուրուլը։

Նրա խոսքով՝ ընտրական հանձնաժողովի կողմից հաշվված քվեաթերթիկների թիվն ընդհանուր առմամբ կազմել է 2,262,424։

Տուրուլը նշում է, որ այս արդյունքները գործնականում վերջնական են։ «Սրանք այն թվերն են, որ մենք ներկա պահին ունենք։ Ճիշտ է՝ դեռ կան մի քանի հազար չհաշվված քվեաթերթիկներ, սակայն կարելի է ասել, որ վերջնական արդյունքը սա է, քանի որ թվերը գրեթե չեն փոխվի», - ամփոփել է Կատալոնիայի կառավարության ներկայացուցիչը։