Եվրոպական կառույցները կարող են որպես միջնորդ հանդես գալ Իսպանիայի և Կատալոնիայի իշխանությունների միջև

Եվրոպական կառույցները կարող են որպես միջնորդ հանդես գալ Իսպանիայի և Կատալոնիայի իշխանությունների միջև կոնֆլիկտը հարթելու համար, և բացառված չէ, որ նրանք կարող են որպես լուծում առաջարկել նոր պաշտոնական հանրաքվե անցկացնել։ Նման կարծիք է հայտնել Ռուսաստանի գիտությունների ակադեմիայի Եվրոպայի ինստիտուտի եվրոպական անվտանգության բաժնի ղեկավար Դմիտրի Դանիլովը․ գրում է Ռիա Նովոստի-ն։

Հիշեցնենք, որ հոկտեմբերի 1-ին Կատալոնիայում անցկացվել է անկախության հանրաքվե, որը չի ընդունում պաշտոնական Մադրիդը։ Անցկացված հանրաքվեի արդյունքում ընտրողների ավելի քան 90%-ը կողմ է քվեարկել անկախությանը։ Կատալոնիայի կառավարության ղեկավար Կարլոս Պուչդեմոնը հայտարարել է, որ Բարսելոնայի և Մադրիդի միջև առկա տարաձայնությունը հաթելու համար անհրաժեշտ է երրորդ ուժի միջնորդություն։

Դանիլովի խոսքով՝ եթե Իսպանիայի և Կատալոնիայի իշխանությունները լրջորեն չզբաղվեն խնդրի լուծման ուղիներ փնտրելով, ապա իրավիճակն ավելի բարդանա և կարող է բացասական հետևանքներ ունենալ ինչպես Իսպանիայի, այնպես էլ ողջ Եվրոպայի համար։

«Կարծում եմ՝ Մադրիդը կոշտ ճանապարհով գնալու հնարավորություն այլևս չունի։ Ուժ կիրառելու լիմիտն սպառվել է, ուստի պետք է որևէ կերպ բանակցել», - նշել է մասնագետը՝ հավելով, որ որպես միջնորդ, ամենայն հավանականությամբ, հանդես կգան եվրոպական կառույցները։