Սոմալիում տեղի ունեցած ահաբեկչության հետևանքով զոհերի թիվը հասել է 276-ի
Նախօրեին Սոմալիի մայրաքաղաք Մոգադիշոյում տեղի ունեցած ահաբեկչության հետևանքով զոհերի թիվը հասել է 276-ի։ Այս մասին հայտնում է Ռիա Նովոստի-ն՝ հղում կատարելով Սոմալիի կառավարության հայտնած տվյալներին։
Հոկտեմբերի 14-ին Մոգադիշոյի մարդաշատ փողոցներից մեկում պայթել էր պայթուցիկ նյութով բեռնված ավտոմեքենան։ Ավելի վաղ հայտնում էին 231 զոհի և 275 վիրավորի մասին։
«Մոտ 300 մարդ է վիրավորվել «Աշ-Շաբաբ» ահաբեկչական խմբավորման բարբարոսական հարձակման հետևանքով», - իր թվիթերյան էջում գրել էր Սոմալիի տեղեկատվության նախարարը։
Միևնույն ժամանակ, Ռոյթերս գործակալության փոխանցմամբ՝ ահաբեկչական գործողության հետևանքով ոչ մի խմբավորում պատասխանատվություն չի ստանձնել։ Նշվում է, որ հարևան երկրները՝ Քենիան, Եթովպիան և Ջիբութին իրենց օգնությունն են առաջարկել Սոմալիին։
Սոմալիում հիմնված «Աշ-Շաբաբ» ծայրահեղական խմբավորումը (երիտասարդ մոջահեդների շարժումը, - խմբ․) ակտիվորեն համագործակցում է «Ալ-Քաիդա» միջազգային ահաբեկչական խմբավորման հետ։ «Աշ-Շաբաբը» զինված պայքար է մղում Սոմալիի իշխանությունների դեմ՝ խանգարելով ՄԱԿ-ի հումանիտար առաքելություններին։ 2008 թ․ ԱՄՆ-ը «Աշ-Շաբաբն» ընդգրկել է ահաբեկչական խմբավորումների ցանկում։