Ավստրիայի խորհրդարանական ընտություններում հաղթում է ԱԳ նախարարի գլխավորած կուսակցությունը

Ավստրիայում արտաքին գործերի նախարար Սեբաստիան Կուրցի գլխավորած Պահպանողական ժողովրդական կուսակցությունն առաջատարն է խորհրդարանի ստորին պալատի արտահերթ ընտրություններում։ Կուսակցության օգտին քվեարկել է ընտրողների 31.5%-ը։ Կանցլեր Քրիստիան Քերնի գլխավորած Սոցիալ-դեմոկրատական կուսակցությունը երկրորդ տեղում է՝ հավաքելով ձայների 26.9%-ը։

Սրանք Ավստրիայի ներքին գործերի նախարարության հրապարակած տվյալներն են։ Նշվում է, որ վերջնական արդյունքները հայտնի կդառնան հոկտեմբերի 19-ին։

Հավաքած 26% ձայնով երրորդ հորիզոնականում է աջակողմյան քաղաքական կողմնորոշում ունեցող «Ազատություն» կուսակցությունը՝ Հայնց Քրիստիան Շտարխեի գլխավորությամբ։ Չորրորդը «Նոր Ավստրիա» կուսակցությունն է (5.3%), իսկ հինգերորդը՝ «Պետեր Պիլցի ցուցակ» կուսակցությունը (4.4%)։ Սա նշանակում է, որ խորհրդարան, ամենայն հավանականությամբ, կանցնի հինգ քաղաքական միավորում։

Ավստրիայի ընտրական հանձնաժողովը կհաստատի ընտրությունների վերջնական արդյունքները հոկտեմբերի 31-ին, իսկ նոր գումարման ազգային ժողովը կհաստատվի նոյեմբերի 9-ին։

Այսպիսով՝ ԱԳ նախարար Սեբաստիան Կուրցի գլխավորած Պահպանողական ժողովրդական կուսակցությունը կդառնա նոր խորհրդարանի ամենաազդեցիկ քաղաքական ուժը, իսկ նրա առաջնորդը կօժտվի կոալիցիոն բանակցություններ վարելու և նախարարների կաբինետ ձևավորելու նախագահական լիազորություններով։ Հաշվի առնելով սա՝ կարելի է ենթադրել, որ Ավստրիայի ապագա կանցլերի պաշտոնը պատրաստվում է զբաղեցնել հենց Սեբաստիան Կուրցը։

Հիշեցնենք, որ Ավստրիայի խորհրդարանական արտահերթ ընտրություններն անցկացվել են կիրակի՝ հոկտեմբերի 15-ին։ Ընտրություններին մասնակցել է 16 կուսակցություն և քաղաքական միավոր։ Խորհրդարան անցնելու համար կուսակցությունները պետք է հաղթահարեին ձայների 4%-ի շեմը։