Վաշինգտոնը վերադարձրել է ՌԴ Գլխավոր հյուպատոսարանի շենքի հանված դրոշները

Վաշինգտոնը վերադարձրել է Սան Ֆրանցիսկոյում ՌԴ գլխավոր հյուպատոսարանի դրոշները, որոնք ավելի վաղ հանվել էին շենքի վրայից։ Այս մասին լրագրողներին հայտնել է Ռուսաստանի արտաքին գործերի փոխնախարար Սերգեյ Ռիբկովը։

«Այո, դրոշները վերադարձրել են․ վերադարձվել է նաև մեր գլխավոր հյուպատոսարանի արխիվը։ Այս ամենը, սակայն, ուղեկցվում են մի շարք գործողություններով, որոնք մեզ համար անընդունելի են։ Մենք բազմիցս մեր դժգոհությունն ենք հայտնել ԱՄՆ-ի իշխանություններին։ Խախտվել է արխիվների անձեռնմխելիությունը», - ասել է Ռիբկովը։

Նրա խոսքով՝ ընդունող երկրի իշխանությունների նման վարքագիծը «ոչ այլ ինչ է, քան սադրանք»։  «Նրանք չէին կարող չվերադարձնել խլված դրոշները և արխիվը, սակայն մեծ անհանգստություն է պատճառում այն, ինչ տեղի է ունեցել ավելի վաղ», - շարունակել է ՌԴ ԱԳ փոխնախարարը՝ ընդծելով, որ ամերիկացիներն այդպիսով ցույց են տալիս, որ պատրաստ են իրենց դիվանագիտական ներկայացուցչությունների նկատմամբ հայելային գործողություններին։

Հիշեցնենք, որ սեպտեմբերի սկզբին ամերիկյան իշխանությունների պահանջով փակվել էին Սան Ֆրանցիսկոյում ՌԴ գլխավոր հյուպատոսարանը և Վաշինգտոնում ռուսական առևտրային ներկայացուցչությունը։ ԱՄՆ-ի իշխանությունները Մոսկվային մինչև հոկտեմբերի 1-ը ժամանակ էին տվել, որպեսզի ռուս դիանագետները հավաքեին իրենց իրերը և ազատեին գլխավոր հյուպատոսարանի շենքը։ Վաշինգտոնը հայտարարել էր, որ այդ շենքերից հանվել է դիվանագիտական անձեռնմխելիությունը՝ չնայած, որ դրանք առաջվա պես հանդիսանում են Ռուսաստանի Դաշնության սեփականությունը։

Հոկտեմբերի 11-ին ԱՄՆ-ի իշխանությունները հանել էին Սան Ֆրանցիսկոյի գլխավոր հյուպատոսարանի շենքի վրայի ռուսական դրոշները։ Մոսկվան այս քայլն անընդունելի էր համարել՝ խոստանալով դիմել դատարան։