Լիբիայի պետական հեղաշրջումը կազմակերպել է Հիլարի Քլինթոնը․ Wikileaks-ի հիմնադիր
Wikileaks-ի հիմնադիր Ջուլիան Ասանժը կարծում է, որ ԱՄՆ-ի նախկին պետքարտուղար Հիլարի Քլինթոնն իր քաղաքական ամբիցիաները բավարարելու համար կազմակերպել է Լիբիայում 2011 թ․ տեղի ունեցած պետական հեղաշրջումը։ Այս մասին Ասանժը խոսել է ռուսական «Առաջին ալիքի» եթերում՝ «Պոզներ» հաղորդմանը տված հարցազրույցում։
Հաղորդումից մի հատված ցուցադրվել է հոկտեմբերի 25-ին, սակայն հարցազրույցն ամբողջությամբ եթեր է գնալու հոկտեմբերի 30-ին։
«Մեր տեղեկություններով՝ Հիլարի Քլինթոնը եղել է ԱՄՆ-ի վարչակազմի կողմից Լիբիայի ոչնչացման ամենաակտիվ կողմնակիցներից։ Նա ցանկանում էր ապացուցել, որ իր դաժանությունը բավարարում է մի ամբողջ պետություն ոչնչացնելու համար, և այդպիսով նա մասնակցեց նախագահական պայքարին։ Նա սպանել է տասնյակ հազարավոր մարդկանց․ տասնյակ հազարավոր՝ իր քաղաքական նպատակներին հասնելու համար», - ասել է Ասանժը՝ հավելելով, որ այդ ժամանակ ԿՀՎ-ի և Պենտագոնի ներկայացուցիչները պնդում էին, որ ռազմական գործողություններ չեն նախատեսվում։
«Լիբիայում Քլինթոնի գործունեությունը հանգեցրել է Իսլամական պետության ստեղծմանը։ Նա լիբիական զենքը տեղափոխել է Սիրիա, որտեղ նույնպես նմանատիպ իրավիճակ է ստեղծվել։ Նա շատ պրոֆեսիոնալ և վտանգավոր մարդ է», - հայտարարել է Wikileaks-ի հիմնադիրը։