Սոմալիում տեղի ունեցած ահաբեկչության հետևանքով զոհվել է 17 մարդ

Սոմալիի մայրաքաղաք Մոգադիշոյում տեղի ունեցած ահաբեկչական մի քանի գործողությունների հետևանքով զոհվել է ավելի քան 17 մարդ, որոնց մեծ մասը՝ իրավապահներ։ Այս մասին հայտնում «Ռոյթերս» լրատվական գործակալությունը։

Ավելի վաղ հաղորդվում էր 10 զոհի մասին։ Նշվում է, որ պայթուցիկ նյութերով բեռնված մեքենան պայթել է քաղաքի կենտրոնում գտնվող հյուրանոցի մոտ՝ նախագահական նստավայրից 600 մետր հեռավորության վրա։ Պայթյունից հետո ահաբեկիչները կրակ են բացել հյուրանոցի ուղղությամբ։ Րոպեներ անց հաջորդել է մյուս պայթյունը, այս անգամ խորհրդարանի նախկին շենքի մոտակայքում։

Ահաբեկչական գործողությունների այս շարքի համար պատասխանատվություն է ստանձնել «Աշ-Շաբաբ» խմբավորումը։

Սոմալիում հիմնված ծայրահեղական այս խմբավորումն (երիտասարդ մոջահեդների շարժումը, - խմբ․) ակտիվորեն համագործակցում է «Ալ-Քաիդա» միջազգային ահաբեկչական խմբավորման հետ։ «Աշ-Շաբաբը» զինված պայքար է մղում Սոմալիի իշխանությունների դեմ՝ խանգարելով ՄԱԿ-ի հումանիտար առաքելություններին։ 2008 թ․ ԱՄՆ-ը «Աշ-Շաբաբն» ընդգրկել է ահաբեկչական խմբավորումների ցանկում։