Կատալոնիան որպես մարտահրավեր է ընդունում Մադրիդի կողմից նշանակված ընտրությունները․ Պուչդեմոն

Իսպանիայի կառավարության կողմից Կատալոնիայում դեկտեմբերի 21-ին նշանակված ընտրություններն ընդունվում են որպես մարտահրավեր։ Այս մասին Բրյուսելում լրագրողների հետ զրույցում հայտարարել է Կատալոնիայի նախկին վարչապետ Կարլոս Պուչդեմոնը, որն աշխատանքից հեռացվել էր Մադրիդի որոշմամբ։

«Դեկտեմբերի 21-ին նշանակված ընտրությունները մեզ համար մարտահրավեր է, որը մենք ընդունում ենք», - հայտարարել է Պուչդեմոնը։

Նա նշել է նաև, որ Բրյուսել կատարած այցով ցանկանում է «աշխարհին ցույց տալ ժողովրդավարության այն լուրջ պակասը, որն առկա է Իսպանիայում»։

Հոկտեմբերի 27-ին Կատալոնիայի խորհրդարանի՝ անկախության հռչակումից հետո Իսպանիայի Սենատը հավանության է արժանացրել սահմանադրության 155-րդ հոդվածը կիրառելու մասին կառավարության դիմումը։ Այս հոդվածը թույլ է տալիս սահմանափակել Կատալոնիայի ինքնավարությունը։

Ավելի ուշ Իսպանիայի վարչապետ Մարիանո Ռախոյը հայտարարել է Կատալոնիայի խորհրդարանի լուծարման, ինչպես նաև ինքնավարության ղեկավար Կարլոս Պուչդեմոնին և ոստիկանության պետին աշխատանքից ազատելու մասին։ Ռախոյը Կատալոնիայի խորհրդարանի նոր ընտրություններ է նշանակել դեկտեմբերի 21-ին։

Հիշեցնենք, որ հոկտեմբերի 1-ին Կատալոնիայում անցկացվել է անկախության հանրաքվե, որը չի ընդունում պաշտոնական Մադրիդը։ Ընտրելու իրավունք ունեցող 5,3 միլիոն քաղաքացիներից հանրաքվեին մասնակցել է 2,2 միլիոնը, որի ավելի քան 90%-ը կողմ է քվեարկել անկախությանը։