Իսպանիայից Կատալոնիայի անկախացմանը հավատում է բնակչության 15%-ը
Իսպանիայից Կատալոնիայի անկախացումը հնարավոր են համարում ինքնավարության բնակչության ընդամենը 15%-ը։ Այս մասին են վկայում La Vanguardia թերթի պատվերով անցկացված սոցհարցման արդյունքները։
Ընդ որում՝ հարցվածների 28%-ը ցանկանում է, որ ներկայիս գործընթացն ավարտվի անկախության հռչակմամբ։ Ավելի քան 36%-ը ցանկանում է, որ խնդիրը լուծվի Իսպանիայի կենտրոնական իշխանությունների և Կատալոնիայի կառավարության միջև երկխոսությամբ։ Սակայն սա հավանական է համարում ընդամենը 21%-ը։
Ավելի քան 41%-ը հույս ունի, որ Կատալոնիայի խորհրդարանի՝ դեկտեմբերի 21-ին նշանակված ընտրությունները կարող են օգնել իրավիճակի կարգավորմանը։
Սոցհարցմանը մասնակցած քաղաքացիների ճնշող մեծամասնությունը (68%) կարծում է, որ «անկախություն ձեռք բերելու գործընթացը պառակտում է մտցրել հասարակության մեջ»։ 61%-ը կարծում է, որ Կատալոնիայի անկախության հռչակումը կարող է հանգեցնել Եվրոպական Միության անդամակցության կորստին։
Ավելի քան 42%-ն իրեն համարում է հավասարապես կատալոնացի և իսպանացի։ Իրեն ավելի շատ կատալոնացի, քան իսպանացի է համարում 21%-ը, միայն կատալոնացի 20%-ը, իսկ միայն իսպանացի՝ 5%-ը։
Սոցհարցումն անցկացվել հոկտեմբերի 30-ից նոյեմբերի 3-ը։ Սոցհարցմանը մասնակցել է 1233 մարդ։