ԻՊ առաջնորդը կարող է գտնվել սիրիական Բու Քեմալ քաղաքում

«Իսլամական պետություն» ահաբեկչական խմբավորման ղեկավար Աբու Բաքըր ալ-Բաղդադին այս պահին կարող է գտնվել Իրաքի հետ սահմանի մոտ գտնվող սիրիական Բու Քեմալ քաղաքում։ Այս մասին հայտնում է «Ալ Մայադին» հեռուստաալիքը՝ հղում կատարելով Սիրիայի Զինված ուժերի մամուլի ծառայությանը։

Աղբյուրը նշում է, որ տեղեկություններ կան ալ-Բաղդադիի՝ Բու Քեմալում գտնվելու մասին, որն ազատագրելու համար պայքարում է սիրիական բանակը։

ԱՄՆ-ի գլխավորած միջազգային կոալիցիայի ներկայացուցիչն, իր հերթին, Reuters լրատվականին հայտնել է, որ իրենք որևէ տեղեկություն չունեն ԻՊ առաջնորդի գտնվելու վայրի մասին։

Օրեր առաջ շրջանառվող լուրերի համաձայն՝ ալ-Բաղդադին Իրաքի Ռավա բնակավայրից անցել էր Սիրիա։ Կասկածներ կային, որ նա գնացել է Դեր Զոր։

Հիշեցենք, որ հոկտեմվերի 25-ին Իրաքի վարչապետ Հեյդար ալ-Աբադիի հրամանով կառավարական ուժերն սկսել էին գրոհել Իսլամական պետության վերջին հենակատերն Իրաքում։ Գործողությանը մասնակցում են Իրաքի դաշնային ոստիկանությունը, բանակի հատուկ նշանակության ջոկատները, արագ արձագանքման ուժերը, ինչպես նաև շիա աշխարհազորայինները։

Նոյեմբերի 3-ին Էլ Քաիմ բնակավայրն արդեն ազատագրվել էր ահաբեկիչներից, իսկ վերջիններս, թողնելով իրենց դիրքերը, տեղափոխվել էին սիրիական Բու Քեմալ բնակավայր։