Կատալոնիայի նախկին ղեկավարը պատրաստ է հանդիպել Իսպանիայի վարչապետի հետ
Կատալոնիայի կառավարության նախկին ղեկավար Կարլոս Պուչդեմոնը, որն ազատվել էր զբաղեցրած պաշտոնից Մադրիդի պահանջով, չի պատրաստվում քաղաքական ապաստան խնդրել Բրյուսելից և պատրաստ է հանդիպել Իսպանիայի վարչապետ Մարիանո Ռախոյի հետ։ Այս մասին Պուչդեմոնը հայտարարել է գերմանական Deutschlandfunk ռադիոկայանին տված հարցազրույցում։
«Ես հաստատապես որոշել եմ քաղաքական ապաստան չխնդրել Բելգիայից, - ասել է Պուչդեմոնը։ Նա պնդում է, որ երբեք էլ չի եղել փախստականի կարգավիճակում՝ չնայած իսպանական մամուլում հաճախ այդ մասին շրջանառվող լուրերին։
«Ես օրինական ճանապարհով ժամանել եմ Բրյուսել և երբեք չեմ թաքնվել», - հավելել է Կատալոնիայի նախկին ղեկավարը։
Նա հավաստիացնում է նաև, որ անթիվ նամակներ է ուղարկել Իսպանիայի վարչապետ Մարիանո Ռախոյին՝ երկխոսության կոչ անելով վերջինիս։
«Նա ինձ ասել է տառացիորեն հետևյալը՝ «Ես չեմ կարող և չեմ ուզում»։ Իսկ ես պարտավոր եմ և ցանկանում եմ հանդիպել նրա հետ, քանի որ անհրաժեշտ է ելք գտնել ստեղծված իրավիճակից», - ասել է Պուչդեմոնը։
Հիշեցնենք, որ հոկտեմբերի 27-ին Կատալոնիայի խորհրդարանի՝ անկախության հռչակումից հետո Իսպանիայի Սենատը հավանության է արժանացրել սահմանադրության 155-րդ հոդվածը կիրառելու մասին կառավարության դիմումը։ Այս հոդվածը թույլ է տալիս սահմանափակել Կատալոնիայի ինքնավարությունը։
Ավելի ուշ Իսպանիայի վարչապետ Մարիանո Ռախոյը հայտարարել է Կատալոնիայի խորհրդարանի լուծարման, ինչպես նաև ինքնավարության ղեկավար Կարլոս Պուչդեմոնին և ոստիկանության պետին աշխատանքից ազատելու մասին։ Ռախոյը Կատալոնիայի խորհրդարանի նոր ընտրություններ է նշանակել դեկտեմբերի 21-ին։