Ռուսաստանի ռազմաօդային ուժերը խափանել են ամերիկյան հետախույզ-ինքնաթիռի թռիչքը

ՌԴ ռազմաօդային ուժերի ՍՈւ-30 կործանիչն օդ է բարձրացվել այն բանից հետո, երբ Ռուսաստանի սահմանների մոտ նկատվել է ամերիկյան հետախույզ-ինքնաթիռ։ Այս մասին տեղեկացնում է ՌԴ հարավային ռազմական շրջանի մամուլի ծառայությունը։

Նշվում է, որ նոյեմբերի 25-ին ռուսական վերահսկող սարքերը Սև ծովի չեզոք գոտում նկատել են օդային թիրախ, որը մեծ արագությամբ շարժվում է Ռուսաստանի պետական սահմանի ուղղությամբ։

Թռիչքը խափանելու համար ՌԴ հակաօդային պաշտպանության ուժերի հերթապահ կազմից ուղարկվել է ՍՈւ-30 կործանիչը։

«Մոտենալով՝ ռուսական կործանիչը շրջանցել է օբյեկտը և ֆիքսել, որ դա ամերիկյան «P-8A Poseidon» հետախուզական ինքնաթիռ է», - ասվում է ՌԴ հարավային ռազմական շրջանի մամուլի ծառայության տարածած հաղորդագրության մեջ։

Ամերիկյան ինքնաթիռն, այնուհետեև, փոխելով թռիչքի ուղղությունը, հեռացել է, իսկ ռուսական կործանիչը վերադարձել է կայանման վայր։

Ավելի վաղ Պենտագոնի ներկայացուցիչ Միշել Բալդանզուն հայտարարել էր, որ ռուսական ՍՈւ-30-ը Սև ծովի վրա «վտանգավոր կերպով» խափանել է ամերիկյան ինքնաթիռի թռիչքը։