Թուրքիայում շարունակվում են զանգվածային ձերբակալությունները

Թուրքիայի անվտանգության ուժերը ձերբակալել են 50 մարդու, այդ թվում՝ ռազմական օդաչուների, որոնք կասկածվում են Գյուլենական շարժման հետ կապեր ունենալու մեջ։ Այս մասին տեղեկացնում է թուրքական Anadolu լրատվական գործակալությունը։

Նշվում է, որ Էսքիշեհիր քաղաքի դատախազությունը 66 մարդու ձերբակալելու հրաման է տվել։ Մնացած 16 հոգուն ձերբակալելու ուղղությամբ դեռ ընթանում են աշխատանքներ։ Նրանք բոլորը մեղադրվում են Գյուլենական շարժման հետ կապ ունենալու մեջ։

Հիշեցնենք, որ նախորդ տարվա հուլիսի 15-ին Թուրքիայում զինվորականները հեղաշրջման փորձ են կազմակերպել։ Ոստիկանությանը հաջողվել էր ճնշել ապստամբներին, և հեղաշրջման փորձը ձախողվել էր։

Թուրքիայի իշխանությունները հեղաշրջման փորձի կազմակերպման մեջ մեղադրում են Թուրքիայում արդի իսլամական գաղափարախոսության հիմնադիր Ֆեթուլլահ Գյուլենին, որը 1998 թվականից բնակվում է ԱՄՆ-ում։ Թուրքիայի նախագահ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։

Ըստ ամերիկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։