Սպիտակ տունը հերքում է Թիլերսոնի պաշտոնանկության մասին լուրերը
Սպիտակ տան աշխատակազմի ղեկավար Ջոն Քելին հերքում է տեղեկություններն այն մասին, թե Ռեքս Թիլերսոնին պետքարտուղարի պաշտոնում պատրաստվում է փոխարինել Մայք Պոմպեոն։ Այս մասին հերթական ճեպազրույցի ժամանակ հայտարարել է Պետքարտուղարության մամուլի ծառայության ղեկավար Հեդեր Նաուերթը՝ մեկնաբանելով Թիլերսոնի պաշտոնանկության վերաբերյալ վերջերս շրջանառվող լուրերը։
«Սպիտակ տան աշխատակազմի ղեկավար Ջոն Քելին այսօր առավոտյան զանգահարեց պետքարտուղարություն և ասաց, որ այդ լուրերը չեն համապատասխանում իրականությանը», - ասել է Նաուերթը։
Նրա խոսքով՝ Քելին խոսել է Թիլերսոնի հետ։ Այդ հեռախոսազրույցի մասին այլ մանրամասներ Նաուերթը չի ներկայացնում։
Միևնույն ժամանակ մամուլի քարտուղարն ընդգծել է, որ նախագահ Թրամփի և պետքարտուղար Թիլերսոնի միջև կան հակասություններ ԱՄՆ-ի արտաքին քաղաքականության վերաբերյալ։
Մայք Պոմպեոն այժմ զբաղեցնում է Կենտրոնական հետախուզական վարչության պետի պաշտոնը։
Հիշեցնենք, որ ավելի վաղ New York Times թերթը հաղորդում էր, որ Սպիտակ տանը ցանկանում են պաշտոնանկ անել Ռեքս Թիլերսոնին և պետքարտուղարի պաշտոնին նշանակել ԿՀՎ պետ Մայք Պոմպեոյին։ Աղբյուրի հավաստմամբ՝ ԿՀՎ պետի պաշտոնն այդ պարագայում կզբաղեցնի Արկանզաս նահանգից հանրապետական սենատոր Թոմ Քոթոնը։ The Washington Post-ի պնդմամբ՝ պաշտոնների տեղափոխության այս մտքի հեղինակը Սպիտակ տան աշխատակազմի ղեկավար Ջոն Քելին է։