Թուրքիայի իշխանությունները հրահանգել են ձերբակալել ամերիկյան հատուկ ծառայությունների նախկին աշխատակցին
Ստամբուլի գլխավոր դատախազությունը հրահանգել է ձերբակալել ԱՄՆ Կենտրոնական հետախուզական վարչության նախկին աշխատակից Գրեմ Ֆուլերին, որը կասկածվում է 2016 թ․ հուլիսյան հեղաշրջման փորձի հետ առնչություն ունենալու մեջ։ Այս մասին տեղեկացնում է NTV հեռուստաալիքը։
Ֆուլերին կարող է մեղադրանք առաջադրվել սահմանադրությունը խախտելու, գործող իշխանություններին տապալելու փորձի և լրտեսության հոդվածներով։
Դատախազությունը փորձում է պարզել՝ արդյոք ԿՀՎ նախկին աշխատակիցը կապ ունի Գյուլենական շարժման հետ, որին Անկարան համարում է ահաբեկչական կազմակերպություն։
Հիշեցնենք, որ նախորդ տարվա հուլիսի 15-ին Թուրքիայում զինվորականները հեղաշրջման փորձ են կազմակերպել։ Ոստիկանությանը հաջողվել էր ճնշել ապստամբներին, և հեղաշրջման փորձը ձախողվել էր։ Թուրքիայի իշխանությունները հեղաշրջման փորձի կազմակերպման մեջ մեղադրում են Թուրքիայում արդի իսլամական գաղափարախոսության հիմնադիր Ֆեթուլլահ Գյուլենին, որը 1998 թվականից բնակվում է ԱՄՆ-ում։ Թուրքիայի նախագահ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։