Էրդողանն ԱՄՆ-ին մեղադրել է Թուրքիան վարկաբեկելու փորձի մեջ

Թուրքիայի նախագահ Ռեջեփ Թայիփ Էրդողանը կարծում է, որ ԱՄՆ-ը ցանկանում է պատժել Թուրքիային ամերիկյան սցերարին մասնակցելուց հրաժարվելու համար։ Այս մասին Էրդողանը հայտարարել է իշխող «Արդարություն և զարգացում» կուսակցության ժողովի ժամանակ․ հայտնում է NTV հեռուստաալիքը։

«Ամերիկան ցանկանում է պատժել, դատապարտել և վարկաբեկել մեզ, քանի որ մենք չենք հետևում իրենց սցենարին։ Նրանք դա անում են մեր երկրում իրենց աջակիցների՝ գյուլենականների հետ», - ասել է Էրդողանը։

Նրա խոսքով՝ ԱՄՆ-ի այս բոլոր «հարձակումները և զրպարտությունները ծառայում են մի նպատակի՝ ծնկի բերել Թուրքիային և անհամաձայնություն սերմանել թուրքական հասարակության շրջանում»։

«Նրանք մեծ ջանքեր են գործադրում, սակայն ոչնչի չեն հասնի», - շարունակել է Էրդողանը։

Հիշեցնենք, որ ավելի վաղ Էրդողանը հայտարարել էր, որ ամերիկյան դատարանները չեն կարող մեղադրանք առաջադրել իր երկրի նկատմամբ: Նրա խոսքով՝ գործարար Ռեզա Զարաբի դեմ ընթացող դատական գործընթացում ներկայացված «բոլոր կեղծ ապացույցները տրամադրվել են Գյուլենական շարժման անդամների կամ նրանց աջակիցների կողմից»։ Էրդողանը պնդում է, որ դա արվում է իր երկրին վնաս հացնելու նպատակով։