Թուրքիայում ձերբակալել են Գյուլենի եղբորորդուն
Թուրքիայի ոստիկանությունը Անկարայում Գյուլենական շարժման դեմ հատուկ գործողության շրջանակներում ձերբակալել է Ֆեթուլլահ Գյուլենի եղբորորդուն՝ Սելման Գյուլենին։ Այս մասին հաղորդում է Haberturk-ը։
Փետրվարին Թուրքիայի արևմտյան Մանիսա քաղաքում իրավապահները ձերբակալել էին Գյուլենի եղբորորդիներից ևս մեկին, իսկ 2016 թ․ հոկտեմբերին Իզմիրում ձերբակալվել էր կրոնական քարոզչի եղբայրը՝ Կութբեթթին Գյուլենը։
Աղբյուրի հավաստմամբ՝ դեկտեմբերի 6-ին Անկարայի դատախազությունը հրաման է արձակել Գյուլենական շարժման ենթադրյալ 87 անդամի ձերբակալության մասին։ Նրանցից 47-ն արդեն ձերբակալվել են։
Հիշեցնենք, որ նախորդ տարվա հուլիսի 15-ին Թուրքիայում զինվորականները հեղաշրջման փորձ են կազմակերպել։ Ոստիկանությանը հաջողվել էր ճնշել ապստամբներին, և հեղաշրջման փորձը ձախողվել էր։ Թուրքիայի իշխանությունները հեղաշրջման փորձի կազմակերպման մեջ մեղադրում են Թուրքիայում արդի իսլամական գաղափարախոսության հիմնադիր Ֆեթուլլահ Գյուլենին, որը 1998 թվականից բնակվում է ԱՄՆ-ում։
Թուրքիայի նախագահ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։