Սոմալիում ոստիկանական ակադեմիայում տեղի ունեցած ահաբեկչության հետևանքով զոհվել է 13 մարդ

Սոմալիի մայրաքաղաք Մոգադիշոյի ոստիկանական ակադեմիայում տեղի ունեցած պայթյունի հետևանքով զոհվել է 13 մարդ։ Այս մասին հայտնում է Reuters լրատվական գործակալությունը։

Ոստիկանության ներկայացուցիչ Մոհամեդ Հուսեյնի խոսքով՝ պայթյունն իրականացրել է մահապարտ ահաբեկիչը, որն ակադեմիա էր ներխուժել ոստիկանական զորահանդեսի ժամանակ։

«Մեր տվյալներով՝ ոստիկանության ակադեմիայում զոհվել է 13 մարդ, վիրավորվել՝ 15-ը», - լրատվականի հետ զրույցում հայտնել է շտապօգնության ներկայացուցիչը։

Աղբյուրի փոխանցմամբ՝ պայթյունի պատասխանատվությունն արդեն ստանձնել է «Աշ Շաբաբ» ծայրահեղական խմբավորումը։

«Աշ Շաբաբ»-ը (երիտասարդ մոջահեդների շարժումը, - խմբ․) Սոմալիում հիմնված ծայրահեղական խմբավորում է։ Այն ակտիվորեն համագործակցում է «Ալ-Քաիդա» միջազգային ահաբեկչական խմբավորման հետ։

«Աշ-Շաբաբը» զինված պայքար է մղում Սոմալիի իշխանությունների դեմ՝ խանգարելով ՄԱԿ-ի հումանիտար առաքելություններին։ 2008 թ․ ԱՄՆ-ը «Աշ-Շաբաբն» ընդգրկել է ահաբեկչական խմբավորումների ցանկում։