ՄԱԿ-ում կասկածում են, որ Իրանը հրթիռներ է մատակարարում Եմենի ապստամբներին

Միավորված ազգերի կազմակերպությունը հետաքննություն է սկսել Իրանի կողմից Եմենի ապստամբներին ապօրինաբար բալիստիկ հրթիռներ մատակարարելու կասկածանքով։ Ինչպես հայտնում է Associated Press-ը, նման հայտարարություն կա կազմակերպության գլխավոր քարտուղար Անտոնիո Գուտերեշի զեկույցում։

Աղբյուրի փոխանցմամբ՝ ՄԱԿ-ի մասնագետներն ուսումնասիրում են այս տարվա հուլիսի 22-ին և նոյեմբերի 4-ին Սաուդյան Արաբիայի վրա «հուսիների» արձակած հրթիռների մնացորդները։

Ավելի վաղ՝ դեկտեմբերի 14-ին, ՄԱԿ-ում ԱՄՆ-ի մշտական ներկայացուցիչ Նիկի Հեյլին Վաշինգտոնում գտնվող ռազմաբազայում ներկայացրել է նոյեմբերի 4-ին Ռիադի օդանավակայանի վրա ուղարկված հրթիռի բեկորները։ Դիվանագետի պնդմամբ՝ ռազմական մասնագետները եկել են այն համոզմանը, որ վերոնշյալ հրթիռներն արտադրվել են Իրանում։

Ամերիկյան կողմի պնդմամբ, Եմենի ապստամբներին հրթիռներ և այլ զինատեսակներ մատակարերելով՝ Իրանը խախտում է ՄԱԿ-ի Անվտանգության խորհրդի մի շարք բանաձևեր։

Նշենք, որ 2014 թ. օգոստոսից Եմենում շարունակվում է կառավարական ուժերի և հուսիների հակամարտությունը: Այն առավել ակտիվ փուլ է մտել 2015 թ. մարտին, երբ հակամարտությանը միջամտել է Սաուդյան Արաբիայի ղեկավարած կոալիցիան: